AQSH prezidenti Donald Tramp rossiyalik hamkasbi Vladimir Putin bilan telefon orqali Ukrainadagi urushni yakunlashni muhokama qildi. Bu haqda New York Post xabar berdi.
Tramp ikki yetakchi o‘rtasidagi suhbat qancha davom etganini ma’lum qilmadi. AQSH prezidenti jang maydonida harbiylarning halok bo‘lishi Putinni “chindan ham tashvishga solayotgani”ni ta’kidladi.
“U odamlarning o‘limi to‘xtashini xohlaydi”, deb aytdi Tramp va Putin mojaroning yaqin kelajakda yakunlanishini istashiga ishonch bildirdi.
AQSH prezidenti urushni tugatishga yordam beradigan “aniq rejasi” borligini aytib, tafsilotlarni keltirmadi. “Ukrainada shunday dahshatli urush kechmoqda. Men buni tugatmoqchiman”, dedi u va milliy xavfsizlik bo‘yicha maslahatchi Mayk Uoltsni mojaroni hal qilishga e’tibor qaratishga chaqirdi.
“Keling, bu uchrashuvlarni o‘tkazaylik. Ular uchrashishmoqchi. Har kuni odamlar halok bo‘lmoqda. Yosh, kelishgan askarlar jon bermoqda. O‘g‘illarimga o‘xshagan navqiron yigitlar qurbon bo‘lmoqda”, dedi AQSH rahbari.
Siyosatchining yana ta’kidlashicha, 2022-yilda prezident bo‘lganida urush sodir bo‘lmagan bo‘lardi.
“Men har doim Putin bilan yaxshi munosabatda bo‘lganman. Bayden mamlakatimiz uchun sharmandalik edi. Butunlay sharmandalik”, dedi AQSH prezidenti.
Avvalroq u kelasi hafta Ukraina prezidenti Vladimir Zelenskiy bilan uchrashib, Ukrainadagi urushni muhokama qilishi mumkinligini aytgandi.
Xavfsizlik kafolatlari evaziga Ukraina resurslaridan foydalanish
Trampning so‘zlariga ko‘ra, u Zelenskiy bilan Rossiya bilan bo‘lajak tinchlik shartnomasida xavfsizlik kafolatlari evaziga amerikalik investorlarga Ukrainadagi nodir metallar konlari va gaz konlariga kirish huquqini berish bo‘yicha 500 million dollarlik kelishuv tuzmoqchi.
G‘arbga Ukrainada foydali qazilmalarni qazib olish huquqini berish haqida Zelenskiy 2024-yil kuzida AQSH prezidentligiga o‘sha paytdagi nomzodlar Donald Tramp va Kamala Harrisga taqdim etgan “g‘alaba rejasi”da ham aytilgan.
3-fevral kuni Tramp bu variant haqida yana gapira boshladi, bu G‘arb siyosatchilari va ommaviy axborot vositalarida katta shov-shuvga sabab bo‘ldi. 7-fevral kuni Zelenskiy Reuters agentligiga bergan intervyusida AQSH Ukraina tabiiy resurslarini o‘zlashtirishda ustuvorlikka ega bo‘lishini, chunki “amerikaliklar hammadan ko‘proq yordam berganini” aytdi.
Izoh (0)