G‘arb va arab ommaviy axborot vositalari xabar berishicha, Misr AQSHga G‘azo aholisini ko‘chirish bo‘yicha o‘z muqobil rejasini taklif etmoqchi.
Qohira prezident Donald Trampning falastinliklarni anklavdan tashqariga ko‘chirish va uni sayyohlik maskaniga aylantirish tashabbusiga qat’iyan qarshi chiqdi. Shimoliy Afrika mamlakati qochqinlarning chiqib ketishi Isroil bilan tuzilgan tinchlik shartnomasiga zarba bo‘lishidan ogohlantirdi.
Misr o‘z hududiga HAMAS a’zolarining kirib kelishidan xavotirda, chunki ular Sinay yarim orolini yahudiy davlatiga qarshi yangi urush uchun tayanch nuqtasiga aylantirishi mumkin, deyiladi xabarda.
AP manbalariga ko‘ra, Misr hukumati G‘azo aholisining tarqalib ketishiga yo‘l qo‘ymaslik uchun diplomatik kampaniya boshlagan. Ularning so‘zlariga ko‘ra, Qohira Tramp ma’muriyatini falastinliklarni Arab Respublikasiga ko‘chirish rejasi 1979-yilgi Misr–Isroil tinchlik shartnomasiga putur yetkazishi mumkinligi haqida xabardor qilgan. Bunday maktub Pentagon, Davlat departamenti va Kongressga yuborilgan. AP suhbatdoshlarining aniqlik kiritishicha, bir vaqtning o‘zida Binyamin Netanyaxu boshchiligidagi Isroil hukumati va bir qator G‘arb davlatlari, jumladan, Buyuk Britaniya, Fransiya va Germaniyaga ham xuddi shunday signal kelgan.
Qatarning The Middle East Eye portali manbalarining ta’kidlashicha, Trampning G‘azo bo‘yicha tashabbusi Misr rasmiylarini hayratda qoldirgan. Misrdagi ba’zi rasmiylar bunday rejaning ichki siyosiy xatarlari, jumladan, “ehtimoliy to‘ntarish” haqida ochiq gapira boshlagan.
Qohiraga falastinlik qochqinlarni qabul qilish taklifi ilgari ham, 2023-yil 7-oktyabrda Isroil va HAMAS o‘rtasida boshlangan keng ko‘lamli mojaroning dastlabki kunlaridayoq berilgan edi, deb ta’kidlaydi AP.
Biroq, bunday ssenariylar oshkora muhokama qilinmagan.
Ammo, Al-Araby Al-Jadeed portali manbalariga ko‘ra, AQSHning amaldagi hukumati Qohiraga kuchli diplomatik bosim o‘tkazmoqda. Ularning taxminiga ko‘ra, Misr rahbariyati Fors ko‘rfazi mamlakatlari kabi mintaqadagi boshqa, yanada ta’sirli o‘yinchilarning yordamisiz Trampning shov-shuvli tashabbusiga qarshi turishda jiddiy qiyinchiliklarga duch keladi.
Izoh (0)