AQSH prezidenti Donald Tramp Ukrainadagi mojaroni hal qilish uchun yaqin orada rossiyalik hamkasbi Vladimir Putin bilan uchrashuv o‘tkazmoqchi. Bu haqda Amerika yetakchisi Davos forumiga masofadan turib qilgan murojaatida ma’lum qildi, deb xabar bermoqda Reuters.
Bir narsa juda muhim. Men prezident Putin bilan iloji boricha tezroq uchrashish va bu urushga chek qo‘yish imkoniyatiga ega bo‘lishni istardim, dedi Tramp.
Uning so‘zlariga ko‘ra, “bu vaziyat ustidan katta hokimiyatga ega” bo‘lgan Xitoy ham mojaroni hal qilishda yordam berishi mumkin.
Umid qilamanki, biz birgalikda ishlaymiz va mojaroni to‘xtatamiz, deya qo‘shimcha qildi Tramp.
AQSH yetakchisi Vashingtonning Ukrainadagi inqirozni tinch yo‘l bilan hal qilish bo‘yicha sa’y-harakatlari allaqachon boshlanganini aytdi. Shu bilan birga, u mojaroni hal qilish usullaridan biri sifatida neft narxini arzonlashtirishni qayd etdi. Trampning fikricha, bu AQSHda inflyatsiyani pasaytirishga va Ukrainadagi mojaro munosabati bilan Rossiyaga bosim o‘tkazishga yordam beradi.
Men Saudiya Arabistoni va OPEKdan neft narxini pasaytirishni so‘rayman. Agar neft narxi pasaysa, Rossiya va Ukraina urushi darhol tugaydi! Hozir bu urush davom etishi uchun narx yetarli darajada yuqori, dedi Tramp.
Bir kun avval AQSH prezidenti agar Moskva Ukraina bo‘yicha muzokaralar stoliga o‘tirmasa, Rossiyaga qarshi sanksiyalarni kengaytirish ehtimoli haqida ogohlantirgandi.
Uning ta’kidlashicha, AQSH butun Rossiya eksportiga yuqori bojlar joriy qilishi mumkin va kelishuvga qisqa muddatda erishish kerakligini ta’kidladi. Shu bilan birga, Tramp Rossiyaga zarar yetkazmoqchi emasligini qo‘shimcha qildi.
Izoh (0)