АҚШ президенти Дональд Трамп бутун дунёдан, шу жумладан, йирик савдо ҳамкорларидан АҚШга пўлат ва алюминий импортига янги 25 фоизлик божлар жорий этилишини айтди. Бу ҳақда The Guardian хабар берди.
АҚШ президенти барча мамлакатлардан импорт қилинадиган металларга тарифлар таъсир қилишини айтди, аммо улар айнан қайси санадан кучга киришини кўрсатмади. У, шунингдек, “ўзаро тарифлар” жорий этилишини таъкидлади. Агар қайсидир давлат Америка товарларига бож солса, АҚШ ҳам ўша мамлакатдан келаётган товарларга импорт божларини жорий этади.
“Ҳаммаси жуда оддий: агар улар биздан ҳақ олса, биз ҳам улардан ҳақ оламиз. Агар улар биздан 130% олса-ю, биз улардан ҳеч нарса олмасак, бу ҳолат давом этиши мумкин эмас”, деди у.
Пўлат ва алюминийга божлар жорий этилиши ҳақидаги хабар Канаданинг Онтарио провинцияси бош вазири Даг Форднинг кескин муносабатига сабаб бўлди. У АҚШ президентини иқтисодиётни хавф остига қўядиган “мақсадларни мунтазам ўзгартириш ва доимий тартибсизлик яратиш”да айблади.
Божлар аввал ҳам қўлланилган
Трамп ўзининг биринчи президентлик муддатида ҳам металларга божлар қўллаган. 2018 йилда у Канада ва Мексикадан ташқари барча мамлакатлардан пўлат импорти учун 25 фоизлик ва алюминий импорти учун 10 фоизлик божларни ўрнатди. Бироқ кейинчалик улар учун ҳам божлар жорий этилди, бироқ 2019 йилда бекор қилинганди.
Сиёсатчи 2018 йилда Америка саноати бошқа мамлакатлар томонидан қўлланиладиган ташқи савдонинг тажовузкор усуллари билан “вайрон бўлганини” таъкидлаганди. Мисол тариқасида у ҳозирда энг яқин ҳамкори бўлган бизнесмен Илон Маскнинг маълумотларини келтирган. Унга кўра, Америка автомобилларини Хитойга олиб кириш 25 фоиз, Хитой автомобилларини АҚШга олиб кириш эса 2,5 фоиз божга тортилган.
Ўша йили Трамп Анқара билан “яхши бўлмаган” муносабатлар туфайли турк пўлати ва алюминийсига нисбатан чораларни кучайтирди, божларни икки баравар оширди. Вазиятнинг ёмонлашиши Америка дипломатик миссиясининг баъзи ходимларининг ҳибсга олиниши фонида юз берди.
2021 йилда, собиқ президент Жо Байден даврида, Европа иттифоқи ва АҚШ божлар масаласини ҳал қилди. Бироқ 2024 йилда унинг маъмурияти ҳам божларни жорий этди: Мексикада эритилмаган ёки қуйилмаган пўлатга 25 фоиз, алюминийга эса 10 фоиз миқдорида бож белгиланди.
Изоҳ (0)