Prezident Donald Trampning AQSHga mis va alyuminiy importiga bojlar joriy etish haqidagi va’dasi mahalliy iste’molchilar uchun narxlarning oshishiga olib keladi. Sababi mamlakatda mahalliy ishlab chiqarishda taqchillik mavjud bo‘lib, sohani tiklash uchun ko‘p vaqt talab etiladi. Bu haqda Reuters agentligi xabar qildi.
Agentlikning yozishicha, Tramp alyuminiy, mis va po‘latga bojlar joriy etishini aytgan. Alyuminiy va mis — Amerika harbiy texnikasini ishlab chiqarish uchun zarur bo‘lgan metallar hisoblanadi.
“Biz mahalliy ishlab chiqarishni ko‘paytirishimiz kerak”, dedi Tramp.
Tramp Jo Bayden davrida inflyatsiya o‘sishidan aziyat chekayotgan iste’molchilar uchun narxlarni pasaytirishga va’da berdi. Ammo tahlilchilarga ko‘ra, uning mamlakat ishlab chiqarish sektorini mustahkamlash uchun importga bojlar joriy etish rejasi narxlarni pasaytirish haqidagi va’dasini buzishi mumkin.
Tariflar qanchalik keng qo‘llanishi noma’lum, biroq bir qancha tog‘-kon rahbarlari turli ssenariylarga tayyorlanayotganini aytishgan, chunki bozorlar savdo oqimlarining potensial o‘zgarishiga tayyor.
“Bu yerda bir nechta noma’lum narsalar bor. Bu tariflar qanday miqyosda qo‘yiladi va kim to‘laydi? Oxir-oqibat, iste’molchi to‘laydi, ayniqsa, mahalliy muqobil bo‘lmasa”, deydi investitsiya tahlilchisi Daniel Morgan.
Uning so‘zlariga ko‘ra, AQSH zavodlari yopilyapti va ularni qayta ochish boshqa choralar qatori yangi infratuzilma va energiya shartnomalarini ham talab qiladi, bularning barchasiga vaqt kerak.
“Rio Tinto va Alcoa kabi Kanada alyuminiy ishlab chiqaruvchilari yangi choralar tufayli yo‘qotishlarga uchrashi dargumon. Buning o‘rniga xarajatlar avtomobil ishlab chiqaruvchilarga sochib yuboriladi, keyin esa ular amerikalik iste’molchilarga o‘tadi”, deya qo‘shimcha qildi Morgan.
Mis haqida, Avstraliyaning Xalqaro mis assotsiatsiyasi bosh direktori Jon Fennell, AQSHning mis importiga bo‘lgan har qanday tariflar uning sanoatiga ta’sir qilishi mumkinligini aytdi, chunki bu mamlakat misning yirik importchisi hisoblanadi.
“Bu Rezolyutsiya kabi yangi konlar uchun foydali bo‘lishi mumkin, ammo bunga erishishga hali ko‘p yillar bor. Asosiy yo‘qotishlar mahalliy ishlab chiqaruvchilar zimmasiga tushadi”, dedi u.
O‘zining inauguratsiya nutqida Donald Tramp Amerikaning “cho‘kishi”ni tugatishga va Bayden ma’muriyatining progressiv kun tartibini keskin ortga qaytarishga asoslangan yangi “oltin davr”ni boshlashga va’da berdi.
78 yoshli prezident qazib olinadigan yoqilg‘i ishlab chiqarishni ko‘paytirish, muhojirlarni deportatsiya qilish kabi agressiv yangi qadamlarni e’lon qildi.
Shu bilan birga, u 1-fevraldan boshlab Kanada va Meksikadan import qilinadigan mahsulotlarga 25 foizgacha bojxona bojlari joriy etish bilan tahdid qildi.
Izoh (0)