Xalqaro jinoiy sud (XJS) 21-noyabr kuni Isroil bosh vaziri Binyamin Netanyaxu va sobiq mudofaa vaziri Yoav Galantni hibsga olishga order bergandi. AQSH prezidenti Donald Tramp mazkur orderga javoban XJSga qarshi sanksiyalar joriy etish to‘g‘risidagi farmonni imzoladi.
Trampning 6-fevral kuni imzolagan farmoni AQSH tomonidan moliyaviy va viza cheklovlarini nazarda tutadi. U AQSH fuqarolari va ittifoqchilariga qarshi sud tergovlarini qo‘llab-quvvatlovchi XJSning mansabdor shaxslari va ularning oila a’zolariga qo‘llaniladi.
Hujjatda aytilishicha, XJS AQSH va Isroilga qarshi “noqonuniy va asossiz harakatlar sodir etgan” va “qonuniy asoslarsiz o‘z yurisdiksiyasini e’lon qilgan hamda Qo‘shma Shtatlar fuqarolari va ularning ba’zi ittifoqchilari, jumladan Isroilga nisbatan dastlabki tergov boshlagan”. Tramp sud “o‘z vakolatlarini yanada ko‘proq suiiste’mol qilib”, Isroil bosh vaziri va sobiq mudofaa vazirini hibsga olishga “asossiz orderlar” berganini aytdi.
Bundan tashqari, AQSH prezidenti Vashington ham, Isroil ham XJS yurisdiksiyasiga kirmasligini ta’kidladi. Unga ko‘ra, Gaagadagi sudning harakatlari Qo‘shma Shtatlar “suverenitetiga tajovuz qiladi va mamlakat milliy xavfsizligi hamda tashqi siyosati sohasidagi ishlarga tahdid” soladi.
AQSH Vakillar palatasi XJSga qarshi sanksiyalarni ma’qulladi
2024-yil iyun oyida AQSH Kongressi Vakillar palatasi Respublikachilar partiyasi tomonidan ishlab chiqilgan XJSga qarshi sanksiyalar joriy etish to‘g‘risidagi qonun loyihasini ma’qulladi.
O‘shanda Vakillar palatasi spikeri Mayk Jonson bu hujjat sud tomonidan Isroil bosh vaziri Binyamin Netanyaxu va mudofaa vaziri Yoav Galantni hibsga olish uchun order so‘roviga javob ekanini ta’kidlagandi.
“AQSH Isroil tomonida qat’iy turadi va xalqaro byurokratlarning Isroil rahbariyatini u sodir etmagan jinoyatlar uchun asossiz hibsga olishga order berishiga yo‘l qo‘ymaydi”, degan Jonson.
AQSH Trampning birinchi prezidentligi davrida XJSga qarshi sanksiyalar kiritgan
2019-yilda AQSH Afg‘onistondagi operatsiya chog‘ida Amerika fuqarolariga qarshi tergov olib borgan XJS xodimlariga mamlakatga kirishni taqiqlagandi. O‘shanda sud amerikalik askarlar va maxsus xizmatlar xodimlarini Yaqin Sharq mamlakatida qiynoqlar qo‘llaganlikda gumon qilgandi.
2021-yilda AQSH sobiq prezidenti Jo Bayden birinchi prezidentlik muddati davomida Tramp ma’muriyati tomonidan XJS xodimlariga nisbatan joriy etilgan sanksiyalarni bekor qilgan.
Izoh (0)