AQSH prezidenti Donald Tramp o‘zidan oldingi prezident Jo Baydenning maxfiy ma’lumotlarga kirishini chekladi. Bu haqda u Truth Social ijtimoiy tarmog‘ida yozgan.
“Jo Baydenning maxfiy ma'lumotlarga kirishda davom etishiga hojat yo'q. Shuning uchun biz darhol Jo Baydenning xavfsizlik bo‘yicha ruxsatini bekor qilamiz va uning uchun tashkil qilinadigan kundalik razvedka brifinglarini tugatamiz”, dedi Tramp.
“Bayden 2021-yilda razvedka hamjamiyatiga AQSHning 45-prezidentiga (ya’ni menga) odatda sobiq prezidentlarga beriladigan milliy xavfsizlik ma'lumotlariga kirishni rad etishni buyurgandi. Maxsus prokuror Robert Xurning hisoboti shuni ko'rsatdiki, Baydenning “xotirasi yomon”. Hattoki uning xotirasi yaxshiroq vaqtlarda ham Baydenga xavfsizlik bo‘yicha ma'lumotlarni ishonib bo‘lmasdi. Men hamisha milliy xavfsizligimizni himoya qilaman. Bayden, sen ishdan bo‘shading! Amerikani yana buyuk qilamiz”, deb yozdi Tramp.
Izoh (0)