AQSHning saylangan prezidenti Donald Tramp Kanada Qo‘shma Shtatlarga qo‘shib olingan taqdirda, mamlakatdagi soliqlar 60 foizdan ko‘proqqa pasayishi mumkinligini ma’lum qildi.
“Agar Kanada bizning 51-shtatimizga aylansa, ularning soliqlari 60 foizdan ko‘proqqa kamayadi, bizneslari darhol ikki barobar o‘sadi va ular dunyodagi boshqa hech qaysi davlatda bo‘lmagan harbiy himoyaga ega bo‘ladi”, deb yozdi Trump Truth Social ijtimoiy tarmog‘ida.
Trampning ta’kidlashicha, bu taklif aholisi AQSHning bir qismi bo‘lishni xohlayotgan Grenlandiyaga ham tegishli. U Daniya orolining Vashingtonga “milliy xavfsizlik maqsadida” zarur ekanligini ta’kidladi. Tramp, shuningdek, AQSH “milliardlab dollar” sarmoya kiritgan Panama kanalidan noqonuniy foydalanayotgan xitoylik askarlarni ham tilga oldi.
Tramp joriy yilning dekabr oyi boshida ilk marta Kanadani AQSHga qo‘shish istagini bildirgan edi. Ushbu takliif Kanada bosh vaziri Justin Tryudo bilan suhbat paytida ilgari surilgan edi. Respublikachi nomzodning tushuntirishicha, agar u joriy etgan 25 foizlik bojlar Kanada iqtisodiyotini “barbod qilsa”, bunday holat yuz berishi mumkin.
Fox’ning xabar berishicha, ushbu ibora uchrashuv ishtirokchilari orasida “asabiy kulgi” uyg‘otgan. Kanada va Meksikadan keladigan tovarlarga nisbatan bojlarni Tramp 20-yanvar kuni inauguratsiyadan so‘ng darhol joriy etishga qaror qilgan. U bunday qadamning zarurligini ushbu davlatlar bilan chegaradan noqonuniy migratsiya va giyohvand moddalar yetkazib berishning ko‘payishi bilan izohladi.
2023-yilda Meksika eksportining qariyb 83 foizi va Kanada eksportining 75 foizi AQSHga yo‘naltirilgan edi. Biroq, bojlarning joriy etilishi AQSH, Meksika va Kanada o‘rtasida 2020-yilda Tramp tomonidan imzolangan hamda NAFTA o‘rnini egallagan Savdo bitimini (USMCA) buzish bo‘ladi.
Izoh (0)