АҚШ президенти Дональд Трамп Россия Хавфсизлик кенгаши раиси ўринбосари Дмитрий Медведевнинг Эрон атрофидаги вазият ҳақидаги хабарига изоҳ бериб, агар бир қатор давлатлар Ислом Республикасига ўзларининг ядровий қуролларини етказиб беришга тайёрлиги тўғрисидаги маълумот тасдиқланса, унга “дарҳол хабар бериш”ни талаб қилди. Бу ҳақда ўзининг Truth Social ижтимоий тармоғидаги саҳифасида маълум қилди.
“Мен Россиянинг собиқ президенти Медведев бепарволик билан “Мен” сўзини ишлатиб, у ва бошқа давлатлар Эронга ядровий қурол бошларини етказиб беришга тайёрлигини айтганини тўғри тушундимми? У ҳақиқатан ҳам шундай дедими ёки менга шундай туюлдими? Агар у шундай деган бўлса ва бу тасдиқланса, илтимос, менга дарҳол хабар беринг”, деб ёзди Трамп.
Америка раҳбарининг айтишича, “ядровий” сўзи “бундай бепарволик билан ишлатилмаслиги” керак.
“Чамаси, шунинг учун Путин – “хўжайин”, дея қўшимча қилган Оқ уй раҳбари.
Шунингдек, Трамп “ўтган дам олиш кунларида аъло даражада фаолият кўрсатган” Америка атом сувости кемалари энг зўр эканлигини таъкидлаган.
“Улар рақибларидан 20 йил олдинда... Бу энг қудратли ва ўлдиргич қурол”, дея ёзди АҚШ президенти.
Оқ уй раҳбари сувости кемаларининг 30 та Tomahawk ракеталари учирганини ва уларнинг барчаси “нишонга аниқ теггани”ни эслатиб ўтди. Шунингдек, у қирувчи самолёт учувчиларига миннатдорчилик билдирган.
22 июнь куни Медведев дунёда Эронга ядровий қуроллар тўпламини беришга тайёр бўлган давлатлар борлигини айтди. Бироқ у қайси давлатлар ҳақида гап кетаётганини аниқлаштирмади.
Россия Хавфсизлик кенгаши раиси ўринбосарининг таъкидлашича, АҚШ президенти Эронга зарбалар бериш орқали ўз мамлакатини қуруқликдаги операция эҳтимоли билан янги можарога тортган.
АҚШнинг Эронга ҳужуми
АҚШ 22 июнга ўтар кечаси Эрондаги учта ядровий объектга зарба берди. Соат 2:30 атрофида Американинг Б-2 самолётлари тоғ ичида жойлашган Фордодаги уранни бойитиш марказига ҳужум қилиб, унга камида ўнлаб 13 тонналик ГБУ-57 бункерга қарши бомбаларини ташлади.
Бир вақтнинг ўзида сувости кемалари Натанз ва Исфаҳондаги объектларга 30 га яқин Tomahawk қанотли ракеталарини учирди. Трамп нишонлар “тўлиқ йўқ қилинганини” эълон қилди. Шу билан бирга, Оқ уйдаги юқори мартабали амалдорнинг The Wall Street Journal’га маълум қилишича, зарбалар Эрондаги режимни ўзгартиришга қаратилмаган “бир марталик операция” бўлган.
Эрон ҳарбийлари АҚШ ҳужумига жавобан Исроилга баллистик ракеталар учирди ва биринчи марта 2 минг километр масофага учадиган энг янги Kheibar моделини қўллади. Натижада Тель Авив, Нес Сион ва Ҳайфа шаҳарларида бир нечта уйлар вайрон бўлди, 86 киши жароҳатланди, дея хабар берди Соғлиқни сақлаш вазирлиги. Исроил мудофаа армияси маълумотларига кўра, Эрон жами 30 га яқин ракета учирган.
Эрон ташқи ишлар вазири Аббос Ароқчи Истанбулда туриб матбуот анжумани ўтказган. У можарога дипломатик ечим кўрмаётганини айтиб, Путин билан учрашиш учун Москвага боришини таъкидлаган. Ароқчи АҚШ президенти “нафақат Эронга, балки ўз халқига ҳам” хиёнат қилганини айтган.
Изоҳ (0)