“Учинчи жаҳон уруши аломатлари бор” — Ҳамид Содиқ дунё депрессив ҳолатдалигини айтди

Сиёсатшунос Ҳамид Содиқ фикрича, навбатдаги жаҳон уруши юз бериши учун айрим аломатлар мавжуд.

Ҳамид Содиқ YouTubeъдаги “Online king” лойиҳасига интервью берди. Суҳбатда сиёсатшуносдан кўплаб мавзулар, жумладан, учинчи жаҳон уруши тўғрисида сўралди.

“Учинчи жаҳон уруши аломатлари бор. Чунки Иккинчи жаҳон уруши бошланишидан олдин ҳам дунёда буюк депрессия вужудга келган ва АҚШ тарифлар эълон қилган. Ҳозир ҳам қандайдир депрессив ҳолатдамиз”, деди мутахассис.

Ҳамид Содиқ Америка президенти Дональд Трамп устидан импичмент бўладими, деган саволга ҳам жавоб қайтарди.

“Қани энди сиёсий институтлар Трампдан устун келса, яхши бўларди. Лекин Трамп ғалаба қозонадиган бўлса, бутун дунё жиддий воқеа-ҳодисаларга тайёр туриши керак. Трампнинг ёнида турганлар, Венс дейсизми ёки бошқасими, президент бўлса, ҳолат каррасига ёмонлашади”, деди сиёсатшунос.

Ҳамид Содиқ суҳбат давомида Дональд Трампни “омадсиз тужжор” дея таърифлади.

Россия Украинага бостириб киргандан бери (2022 йил 24 февраль) қатор дунё етакчилари ва таниқли шахслар навбатдаги жаҳон уруши рўй беришидан огоҳлантира бошлаган. 

Аввалроқ Россиянинг собиқ президенти, ҳозирда Хавфсизлик кенгаши раиси ўринбосари Дмитрий Медведев дунё учинчи жаҳон уруши ёқасида турганини айтганди.

Венгрия ташқи ишлар вазири Петер Сиярто “Украинанинг НАТОга қабул қилиниши учинчи жаҳон уруши бошланишини англатади”, дея баёнот берган.