Donald Tramp ko‘rsatmasi bilan AQSH Eronning uchta yadroviy obyekti, jumladan, mustahkamlangan Fordoga zarba berdi.
“Biz zarbalarni muvaffaqiyatli yakunladik. Hamma samolyotlar endilikda Eron havo hududidan tashqarida. Bombalarning to‘liq yuklamasi asosiy nishon — Fordoga tashlandi. Barcha samolyotlar endi xavfsiz tarzda ortga qaytmoqda.
Buyuk Amerika jangchilarimizni tabriklaymiz. Bunday ishni dunyodagi boshqa hech bir harbiy kuch bajara olmasdi”, deb yozgan AQSH prezidenti o‘zining Truth Social ijtimoiy tarmog‘ida.
Fox News’ga ko‘ra, AQSH Eronning Fordo yadroviy obyektiga B-2 Spirit bombardimonchilari bilan 6 ta bunker teshuvchi bomba tashlagan. Bundan tashqari, yana ikki yadroviy obyektga 640 km uzoqlikdagi suvosti kemalaridan 30 ta Tomahawk raketasi uchirilgan.
“Eron endi tinchlikni tanlashi kerak. Aks holda, keyingi hujumlar bundan ham kattaroq va ancha oson bo‘ladi. Yana ko‘plab nishonlar bor... Agar tinchlik tez orada kelmasa, biz ularni aniqlik, tezlik va mahorat bilan yo‘q qilamiz”, deya Tramp Eronni ogohlantirdi.
U, shuningdek, bu holat davom etmasligini ta’kidladi. “Yoki tinchlik bo‘ladi yoki Eron uchun so‘nggi sakkiz kun ichida ko‘rganimizdan ancha dahshatli fojia yuz beradi”, degan AQSH yetakchisi onlayn murojaatida.
U Isroil bosh vaziri Binyamin Netanyaxuga minnatdorlik bildirib, AQSH va Isroil “bir jamoa sifatida ishlaganini” aytdi.
“Men bosh vazir Netanyaxuga minnatdorlik bildirmoqchiman. Biz bir jamoa sifatida, ehtimol, ilgari hech kim kabi, hamkorlikda ishladik. Bu Isroil uchun xavfni yo‘q qilish yo‘lida katta qadam bo‘ldi. Isroil armiyasiga qilgan ajoyib ishi uchun minnatdorman”, degan Tramp.
AQSH prezidentiga ko‘ra, bu hujumlarning asosiy maqsadi Eronning yadro boyitish imkoniyatini tugatish va “terrorizmning dunyodagi eng yirik homiysi” tomonidan kelayotgan yadro tahdidini to‘xtatish bo‘lgan.
Izoh (0)