Россия Федерацияси президенти Владимир Путин ва Туркия президенти Ражаб Тоййиб Эрдўғон телефон суҳбати чоғида Исроилнинг Эронга қарши ҳужумини қоралади. Шунингдек, мулоқот давомида икки томонлама муносабатлар ва минтақавий масалалар муҳокама қилинган.
Anadolu агентлигининг маълум қилишича, суҳбат давомида Эрдўғон Исроил ҳукуматининг ҳаракатларини танқид қилиб, уларни “халқаро тизимга очиқ таҳдид” деб атаган. Шунингдек, Туркия президенти минтақадаги уруш воқеаларнинг номақбул ривожланиши эканини таъкидлаган.
Кремль матбуот хизматининг қайд этишича, Путин ва Эрдўғон Исроилнинг БМТ Устави ва халқаро ҳуқуқнинг бошқа нормаларига зид равишда Эронга қарши куч ишлатиш ҳаракатини қоралаган.
“Икки томон ҳам кўплаб қурбонларга олиб келган ва бутун минтақа учун оғир узоқ муддатли оқибатларга олиб келиши мумкин бўлган Эрон-Исроил можаросининг давом этаётганидан жиддий хавотирда эканлиги билдирилди. Раҳбарлар жанговар ҳаракатларни зудлик билан тўхтатиш ва баҳсли масалаларни, шу жумладан Эрон ядро дастури билан боғлиқ масалаларни фақат сиёсий-дипломатик воситалар билан ҳал қилиш зарурлиги ҳақида фикр билдирдилар”, дейилади Кремль баёнотида.
Бу борада икки мамлакатнинг тегишли идоралари яқиндан ҳамкорлик қилишга келишиб олинган.
“Украина муаммосини муҳокама қилиш чоғида Владимир Путин Туркия томонига Россия-Украина тўғридан-тўғри музокараларига ташкилий ёрдам кўрсатгани учун миннатдорчилик билдирди. Таъкидланишича, Россия уларнинг иккинчи раунди якунлари бўйича эришилган келишувларни, жумладан, ҳалок бўлган ҳарбий хизматчиларнинг жасадларини топшириш ва ҳарбий асирларни алмашиш бўйича келишувларни қатъий бажармоқда”, дейилади хабарда.
Бундан аввал Путин Трамп билан телефон орқали суҳбатлашганди, Суҳбат 50 дақиқа давом этганди.
Эрон-Исроил можароси
13 июнга ўтар кечаси Исроил Эрон ядро қуроли яратишга яқинлашгани сабабли ядровий, ҳарбий объектлар ва юқори мартабали ҳарбийлар жойлашган манзилларга ҳужум қилди.
Зарбалар оқибатида Ислом инқилоби қўриқчилари корпусининг бир неча раҳбарлари ва эронлик физик-ядрошунослар ҳалок бўлди. Улар орасида Корпус қўмондони Ҳусайн Саламий, Эрон Қуролли кучлари бош штаби бошлиғи Муҳаммад Бақерий, ИИҚК “Хотам ал-Анбиё” бўлинмаси қўмондони Ғулом Али Рашид, шунингдек, олимлар Фаридун Аббосий Давоний ва Озод Муҳаммад Маҳдий Теҳрончий бор. Жами 78 киши ҳалок бўлди, 320 дан ортиқ киши жароҳат олди.
Ўша куни кечқурун Ислом инқилоби қўриқчилари корпуси Исроилга қарши “Ҳақиқий ваъда-3” жавоб операцияси бошланганини эълон қилди. Эрон Исроилга уч марта ракета зарбалари берди, зарбалар бир нечта шаҳарларда қайд этилди. 70 дан ортиқ киши жароҳат олди, бир аёл ҳалок бўлди. Шу пайтда Теҳронда яна портлашлар эшитилди.
Эрон ва АҚШ апрель ойида ядровий келишув бўйича музокараларни қайта бошлади, беш раунд ўтказилди. Улар асосан Уммон ҳудудида ва билвосита тарзда бўлиб ўтди. Эрон ядро қуроли яратишга интилиш ҳақидаги айбловларни рад этмоқда ва келишув доирасида уранни бойитишдан воз кечмоқчи эмас.
Изоҳ (0)