АҚШ президенти Дональд Трамп Эронда катта нефть захиралари борлигини ҳисобга олган ҳолда, Теҳроннинг уранни ҳатто минимал даражада бойитишни кўзда тутувчи фуқаролик ядро дастурини ишлаб чиқиши мақсадга мувофиқлигини тушуниши қийинлигини маълум қилди. У бу ҳақда Нью Жерси штатидаги аэропортда журналистларга билдирган.
Маълум қилинишича, Трамп Исроилни Эронга зарба беришни тўхтатишга чақириш ниятида эмаслигини айтган.
“Менимча, ҳозир бундай сўровни бериш мушкул бўларди. Агар кимдир ғалаба қозонаётган экан, буни талаб қилиш, кимдир мағлуб бўлаётган ҳолатга қараганда бир оз қийинроқ”, деди Трамп.
АҚШ президенти Европанинг Эрон атрофидаги ҳозирги вазиятда ёрдам бера олишига шубҳа билдирди. Унинг фикрича, Теҳрон Брюссел билан эмас, Вашингтон билан музокаралар олиб боришни истаяпти.
Таъкидланишича, Трамп Эронга ядровий дастур бўйича келишувга эришиш учун беришга тайёр бўлган сўнгги муддат сифатида икки ҳафтани белгилаган.
“Бу вақт оралиғи қандай бўлишини кўрамиз, лекин мен уларга вақт беряпман ва айтишим мумкинки, икки ҳафта — бу энг кўпи”, дея таъкидлади Оқ уй раҳбари.
Трампнинг сўзларига кўра, мамлакатда нефть бўла туриб, Эронга ядро энергетикаси нима учун кераклигини тушуниш қийин.
“Улар дунёдаги энг йирик нефть конларидан бирига эга. Мен шунчаки фуқаролик мақсадларига бу нима учун кераклигини тушунмайман”, деди Трамп.
“Баъзи давлатлар: биз маълум миқдорда ядро энергетикаси билан шуғулланишни хоҳлаймиз, чунки бу бизга электр энергияси ишлаб чиқариш, ҳавони кондициялаш ва бошқа мақсадлар учун керак, дейишса, бу бошқа масала. Аммо дунёдаги энг катта нефть захираларига эга бўлганингизда, бу сизга нима учун кераклигини тушуниш бир оз мушкул”, дейди АҚШ президенти.
Бундан аввал Трамп ўзининг Truth Social ижтимоий тармоғида Оқ уйнинг собиқ раҳбари Барак Обамани Эрон ядро дастурини ривожлантиришда айблаганди.
Изоҳ (0)