АҚШ Конгресси Вакиллар палатаси аъзоси Александрия Окасио-Кортес Эронга қарши зарбалари сабаб президент Дональд Трампга нисбатан импичмент масаласини кун тартибига олиб чиқди. Унинг таъкидлашича, Оқ уй раҳбари Конгресс рухсатисиз ҳарбий куч қўллаш билан конституцияни қўпол равишда бузган.
Нима бўлди?
Бугун, 22 июнь куни эрта тонгда Қўшма Штатлар Эроннинг учта ядровий иншооти, жумладан, Фордо объектига зарба берди. Fox News телеканалига кўра, ҳужумда 3 та B-2 Spirit стратегик бомбардимончилари қўлланган. Шунингдек, яна иккита нишонга сувости кемаларидан Tomahawk қанотли ракеталари орқали зарба берилган. CNN эса мазкур амалиётга 3 эмас, 6 та стратегик бомбардимончи жалб этилганини маълум қилди.
Орадан кўп ўтмай, Дональд Трамп Оқ уйда туриб америкаликларга мурожаат қилди. У, шунингдек, “Эрон энди тинчликни танлаши кераклигини, акс ҳолда кейинги ҳужумлар бундан ҳам каттароқ ва анча осон бўлиши”ни таъкидлади.
Тарафдорлари унинг бу ҳаракатларини маъқулласа-да, бошқалар Эронга зарба минтақавий урушга олиб борувчи эскалация бўлишидан хавотирда.
“Президентнинг рухсатсиз равишда Эронни бомбардимон қилгани — Конституция ва уруш ваколатлари тўғрисидаги қонуннинг оғир бузилиши ҳисобланади. У бутун бир авлодни қамраб олиши мумкин бўлган уруш хавфини ўйламай бошлади. Бу мутлақо ва аниқ импичментга асос бўлади”.
Axios нашрининг ўзи танишган хатга таяниб хабар беришича, яқин кунларда импичмент учун маблағ йиғиш кампанияси бошланади.
Энди нима бўлади?
2024 йилги президентлик сайловида мағлуб бўлгандан сўнг демократ сиёсатчиларнинг аксарияти парда ортига ўтди. Бироқ партиянинг энг фаол ва прогрессив етакчиларидан бири Окасио-Кортес импичмент масаласида ташаббусни ўз қўлига олмоқчи. Демократларнинг Конгрессдаги етакчиси ҳам унинг фикрларини дастаклади.
“Трамп ҳарбий куч қўллаш учун Конгрессдан рухсат олишга уринмади ва бу билан АҚШни Яқин Шарқдаги ҳалокатли урушга тортилишдек хавф билан юзлаштирди”, деган Ҳаким Жеффрис ўз баёнотида.
У, шунингдек “бир томонлама ҳарбий ҳаракати натижасида юзага келадиган ҳар қандай салбий оқибат учун жавобгарлик тўлиқ Дональд Трампнинг зиммасига юкланиши”ни қўшимча қилди.
Изоҳ (0)