Путин Трамп билан бугун, шанба куни телефон орқали суҳбатлашди ва суҳбат 50 дақиқа давом этди.
Қайд этилишича, етакчилар ўртасидаги суҳбат фойдали бўлган. Улар Яқин Шарқдаги кескинлашган вазиятни муҳокама қилган. Россия етакчиси Трампга бир кун аввал Эрон президенти ва Исроил бош вазири билан ўтказган телефон суҳбатлари ҳақида айтган.
Путин Трампга Россиянинг Эрон ядровий маълумотлари бўйича ўзаро мақбул келишувларни топиш ҳақидаги таклифини эслатди. Трамп Яқин Шарқдаги вазиятни жуда хавотирли деб баҳолади. Президентлар Эрон ядро дастури бўйича музокаралар йўлига қайтишни истисно қилмади.
Эрон-Исроил можароси
13 июнга ўтар кечаси Исроил Эрон ядро қуроли яратишга яқинлашгани сабабли ядровий, ҳарбий объектлар ва юқори мартабали ҳарбийлар жойлашган манзилларга ҳужум қилди.
Зарбалар оқибатида Ислом инқилоби қўриқчилари корпусининг бир неча раҳбарлари ва эронлик физик-ядрошунослар ҳалок бўлди. Улар орасида Корпус қўмондони Ҳусайн Саламий, Эрон Қуролли кучлари бош штаби бошлиғи Муҳаммад Бақерий, ИIQК “Хотам ал-Анбиё” бўлинмаси қўмондони Ғулом Али Рашид, шунингдек, олимлар Фаридун Аббосий Давоний ва Озод Муҳаммад Маҳдий Теҳрончий бор. Жами 78 киши ҳалок бўлди, 320 дан ортиқ киши жароҳат олди.
Ўша куни кечқурун Ислом инқилоби қўриқчилари корпуси Исроилга қарши “Ҳақиқий ваъда-3” жавоб операцияси бошланганини эълон қилди. Эрон Исроилга уч марта ракета зарбалари берди, зарбалар бир нечта шаҳарларда қайд этилди. 70 дан ортиқ киши жароҳат олди, бир аёл ҳалок бўлди. Шу пайтда Теҳронда яна портлашлар эшитилди.
Эрон ва АҚШ апрель ойида ядровий келишув бўйича музокараларни қайта бошлади, беш раунд ўтказилди. Улар асосан Уммон ҳудудида ва билвосита тарзда бўлиб ўтди. Эрон ядро қуроли яратишга интилиш ҳақидаги айбловларни рад этмоқда ва келишув доирасида уранни бойитишдан воз кечмоқчи эмас.
Изоҳ (0)