Xiaomi компанияси 16 литр ҳажмли Mijia Smart Gas Water Heater Pro Soft Water Dual-Core ақлли газли сув иситгичини тақдим этди. NotebookCheck нашрининг хабар беришича, иситгич Хитойда 5999 юанга (тахминан 10,3 миллион сўм) сотувга чиқарилган.
Моделнинг асосий хусусияти ўрнатилган сувни юмшатиш тизими ҳисобланади. Корпусда тузлар учун контейнер мавжуд бўлиб, улар орқали сув ион алмашинувчи қатрон ёрдамида филтрлаш жараёнидан ўтади. Ишлаб чиқарувчининг таъкидлашича, бу усул 99,9% гача кальций ва магний ионларини йўқотиш имконини беради, тўрт босқичли тозалаш тизими эса қўшимча равишда 99,9% гача бактерияларни йўқ қилади.
Сув иситгич барқарор ҳароратни сақлаб туриш учун икки томонлама айланиш технологияси ва биноларнинг юқори қаватларига иссиқ сув етказиб беришни тезлаштирувчи TSI boost насоси билан жиҳозланган. Қурилма ошхона, ҳаммом ва кир ювиш хоналарида фойдаланиш учун мўлжалланган.
Модель HyperОС Connect экотизимига интеграциялашган ва ақлли уй сценарийларини қўллаб-қувватлайди. Масалан, ақлли эшик қулфи очилганда тизим автоматик равишда иситишни ёқиши мумкин. Бошқарув мобил илова, 2,4 ГГс Wi-Fi, Bluetooth 5.0 ва Хиао AI овозли ёрдамчиси орқали амалга оширилади.
Хавфсизликни таъминлаш учун сув сизиб чиқишини аниқлаш датчиклари, қизиб кетиш ва музлашдан ҳимоя тизимлари ўрнатилган. Илова, шунингдек, фойдаланувчиларга юмшатувчи тузларни алмаштириш зарурлиги ҳақида эслатма юборади.
Xiaomi компаниясининг ушбу моделни Хитойдан ташқарида ишлаб чиқариш режалари ҳақида маълумот йўқ.
Бундан аввал Xiaomi 23 000 Paskal сўриш кучига эга бўлган янги Mijia Robot Vacuum Mop 5 Pro робот-чангютгичини тақдим этганди. Қурилма иккита робоцимон чўтка билан жиҳозланган бўлиб, улар полни бир вақтда ҳам супуриш, ҳам ювиш вазифасини бажаради.
Шунингдек, компания бош суяги орқали товуш узатадиган Bone Conduction Earphones’нинг иккинчи авлодини ҳам тақдим этганди.
Изоҳ (0)