Россия Хавфсизлик кенгаши раиси ўринбосари Дмитрий Медведев АҚШнинг 22 июнь куни Эрондаги учта ядровий объектга қилгани ҳужумига муносабат билдирди. У “тинчликпарвар Трамп янги уруш бошлагани”ни таъкидлади.
Медведевга кўра, аксарият давлатлар АҚШ ва Исроилнинг ҳаракатларига қарши. Ҳужум оқибатида Эрон ядро объекти деярли шикастланмаган ёки оз зарар кўрган.
Ядро материалларини бойитиш, энди очиқ айтиш мумкинки, келажакда ядро қуролларини ишлаб чиқариш ҳам давом эттирилади. Бир қатор мамлакатлар Эронга ўзларининг ядровий ўқ-дорилар тўпламини тўғридан-тўғри етказиб беришга тайёр, деди у.
Медведев Исроил ҳужум остида экани, портлашлар янграб, одамлар ваҳимага тушаётганига эътибор қаратди. Сиёсатчи АҚШ қуруқликдаги операция эҳтимоли билан янги можарога тортилганини таъкидлади.
Эрон сиёсий тузуми сақланиб қолди, балки кучайган ҳам бўлиши мумкин. Халқ диний раҳнамо атрофида бирлашмоқда, ҳатто илгари уни ёқтирмаганлар ҳам, деди Россия Хавфсизлик кенгаши раиси ўринбосари.
У бундай “ютуқлар” билан Трамп тинчлик бўйича Нобель мукофотини ололмаслигини қайд этди.
Яхши бошланди, табриклайман, жаноб президент!, дея хулоса қилди Дмитрий Медведев.
АҚШнинг Эронга ҳужуми
АҚШ 22 июнга ўтар кечаси Эрондаги учта ядровий объектга зарба берди. Соат 2:30 атрофида Американинг Б-2 самолётлари тоғ ичида жойлашган Фордодаги уранни бойитиш марказига ҳужум қилиб, унга камида ўнлаб 13 тонналик ГБУ-57 бункерга қарши бомбаларини ташлади.
Бир вақтнинг ўзида сувости кемалари Натанз ва Исфаҳондаги объектларга 30 га яқин Tomahawk қанотли ракеталарини учирди. Трамп нишонлар “тўлиқ йўқ қилинганини” эълон қилди. Шу билан бирга, Оқ уйдаги юқори мартабали амалдорнинг The Wall Street Journalъга маълум қилишича, зарбалар Эрондаги режимни ўзгартиришга қаратилмаган “бир марталик операция” бўлган.
Эрон ҳарбийлари АҚШ ҳужумига жавобан Исроилга баллистик ракеталар учирди ва биринчи марта 2 минг километр масофага учадиган энг янги Kheibar моделини қўллади. Натижада Тель Авив, Нес Сион ва Ҳайфа шаҳарларида бир нечта уйлар вайрон бўлди, 86 киши жароҳатланди, дея хабар берди Соғлиқни сақлаш вазирлиги. Исроил мудофаа армияси маълумотларига кўра, Эрон жами 30 га яқин ракета учирган.
Эрон ташқи ишлар вазири Аббос Ароқчи Истанбулда туриб матбуот анжумани ўтказган. У можарога дипломатик ечим кўрмаётганини айтиб, Путин билан учрашиш учун Москвага боришини таъкидлаган. Ароқчи АҚШ президенти “нафақат Эронга, балки ўз халқига ҳам” хиёнат қилганини айтган.
Изоҳ (0)