AQSH prezidenti Donald Tramp Rossiya Xavfsizlik kengashi raisi o‘rinbosari Dmitriy Medvedevning Eron atrofidagi vaziyat haqidagi xabariga izoh berib, agar bir qator davlatlar Islom Respublikasiga o‘zlarining yadroviy qurollarini yetkazib berishga tayyorligi to‘g‘risidagi ma’lumot tasdiqlansa, unga “darhol xabar berish”ni talab qildi. Bu haqda o‘zining Truth Social ijtimoiy tarmog‘idagi sahifasida ma’lum qildi.
“Men Rossiyaning sobiq prezidenti Medvedev beparvolik bilan “Men” so‘zini ishlatib, u va boshqa davlatlar Eronga yadroviy qurol boshlarini yetkazib berishga tayyorligini aytganini to‘g‘ri tushundimmi? U haqiqatan ham shunday dedimi yoki menga shunday tuyuldimi? Agar u shunday degan bo‘lsa va bu tasdiqlansa, iltimos, menga darhol xabar bering”, deb yozdi Tramp.
Amerika rahbarining aytishicha, “yadroviy” so‘zi “bunday beparvolik bilan ishlatilmasligi” kerak.
“Chamasi, shuning uchun Putin – “xo‘jayin”, deya qo‘shimcha qilgan Oq uy rahbari.
Shuningdek, Tramp “o‘tgan dam olish kunlarida a’lo darajada faoliyat ko‘rsatgan” Amerika atom suvosti kemalari eng zo‘r ekanligini ta’kidlagan.
“Ular raqiblaridan 20 yil oldinda... Bu eng qudratli va o‘ldirgich qurol”, deya yozdi AQSH prezidenti.
Oq uy rahbari suvosti kemalarining 30 ta Tomahawk raketalari uchirganini va ularning barchasi “nishonga aniq teggani”ni eslatib o‘tdi. Shuningdek, u qiruvchi samolyot uchuvchilariga minnatdorchilik bildirgan.
22-iyun kuni Medvedev dunyoda Eronga yadroviy qurollar to‘plamini berishga tayyor bo‘lgan davlatlar borligini aytdi. Biroq u qaysi davlatlar haqida gap ketayotganini aniqlashtirmadi.
Rossiya Xavfsizlik kengashi raisi o‘rinbosarining ta’kidlashicha, AQSH prezidenti Eronga zarbalar berish orqali o‘z mamlakatini quruqlikdagi operatsiya ehtimoli bilan yangi mojaroga tortgan.
AQSHning Eronga hujumi
AQSH 22-iyunga o‘tar kechasi Erondagi uchta yadroviy obyektga zarba berdi. Soat 2:30 atrofida Amerikaning B-2 samolyotlari tog‘ ichida joylashgan Fordodagi uranni boyitish markaziga hujum qilib, unga kamida o‘nlab 13 tonnalik GBU-57 bunkerga qarshi bombalarini tashladi.
Bir vaqtning o‘zida suvosti kemalari Natanz va Isfahondagi obyektlarga 30 ga yaqin Tomahawk qanotli raketalarini uchirdi. Tramp nishonlar “to‘liq yo‘q qilinganini” e’lon qildi. Shu bilan birga, Oq uydagi yuqori martabali amaldorning The Wall Street Journal’ga ma’lum qilishicha, zarbalar Erondagi rejimni o‘zgartirishga qaratilmagan “bir martalik operatsiya” bo‘lgan.
Eron harbiylari AQSH hujumiga javoban Isroilga ballistik raketalar uchirdi va birinchi marta 2 ming kilometr masofaga uchadigan eng yangi Kheibar modelini qo‘lladi. Natijada Tel Aviv, Nes Sion va Hayfa shaharlarida bir nechta uylar vayron bo‘ldi, 86 kishi jarohatlandi, deya xabar berdi Sog‘liqni saqlash vazirligi. Isroil mudofaa armiyasi ma’lumotlariga ko‘ra, Eron jami 30 ga yaqin raketa uchirgan.
Eron tashqi ishlar vaziri Abbos Aroqchi Istanbulda turib matbuot anjumani o‘tkazgan. U mojaroga diplomatik yechim ko‘rmayotganini aytib, Putin bilan uchrashish uchun Moskvaga borishini ta’kidlagan. Aroqchi AQSH prezidenti “nafaqat Eronga, balki o‘z xalqiga ham” xiyonat qilganini aytgan.
Izoh (0)