Вашингтон Россия мудофаа комплекси билан ҳар қандай муҳим келишувларда иштирок этган иттифоқдош давлатларга қарши санкциялар қўллаши мумкин. Бу ҳақда Давлат департаменти раҳбари Энтони Блинкен хорижлик журналистлар иштирокидаги онлайн давра суҳбатида айтиб ўтди.
«Биз Туркияни С-400 комплексларини сотиб олишдан воз кечишга аниқ ва қатъий равишда ундадик», — дея Блинкен, шунга қарамай, АҚШ Анқара билан мулоқотни давом эттиришини таъкидлади. Давлат котибининг айтишича, Россиянинг зенит-ракета комплексларини сотиб олиш НАТО аъзолари томонидан 2016 йилда Варшавада бўлиб ўтган альянс саммитининг қарорларига биноан қабул қилинган иттифоқчилик мажбуриятларига, хусусан, Россияда ишлаб чиқарилган қуроллардан фойдаланмаслик шартига зид келади.
«Туркия томонидан С-400 комплекси сотиб олиниши АҚШ хавфсизлиги ва иттифоқчиларнинг ҳарбий технологиясини хавф остига қўйиб, иттифоқнинг бирдамлигини бузади. Иттифоқ мамлакатларининг ўзаро алоқалари ҳам таҳдид остида қолади», — деди Блинкен.
Бундан ташқари, ушбу келишув Россия мудофаа комплексига катта даромад келтиради ва шу билан бирга Россия Туркия мудофаа саноатига кириш имкониятига эга бўлади.
Давлат котиби 2017 йилда АҚШ Конгресси CAATSA (Америка душманларига қарши санкциялар орқали курашиш) тўғрисидаги қонунни қабул қилганини ва Россиянинг ҳамкорларига қарши иккиламчи санкциялар жорий қилганини эслатиб ўтди. «Туркия ва АҚШнинг барча иттифоқчилари ва шериклари келажакда Россия қуролларини, шу жумладан С-400 комплексларини сотиб олишдан йироқ бўлиши жуда муҳимдир», — деди у, Россия қуроллари билан боғлиқ ҳар қандай муҳим битимлар CAATSA қонуни доирасига кириши мумкинлигини айтиб.
Туркиялик журналистнинг саволларига жавоб берар экан, Блинкен ўтган ҳафта президент Жо Байденнинг 1915 йилги арманлар геноциди учун Туркиянинг жавобгарлиги тўғрисидаги баёнотига изоҳ берди. Давлат котибининг таъкидлашича, бу қарор ҳеч кимни ажаблантирмаслиги керак эди, чунки Байден президент бўлишидан анча олдин «кўп йиллар давомида» бу фикрни қўллаб-қувватлаган. «Президент иш бошлаган биринчи кунданоқ инсон ҳуқуқлари ва демократия масалалари АҚШ ташқи сиёсатининг асосий мавзуси бўлишини очиқ айтди. Бунинг бир қисми сифатида геноциднинг тан олиниши тарих ва ўтмишдаги жиноятлар такрорланмаслигига интилишдир», — дея хулоса қилди Блинкен.
Вашингтон Анқарага Россиянинг С-400 зенит-ракета комплексини сотиб олгани сабабли бир неча марта санкциялар билан таҳдид қилган эди. Туркия мудофаа саноати маъмурияти 2017 йил 2 августда Россия билан Туркия ҳукумати номидан қурол етказиб бериш бўйича шартнома имзолаган. Ҳаво ҳужумига қарши мудофаа комплексларининг биринчи партияси 2019 йил ўрталарида мамлакатга келтирила бошлаган, ноябрь ойида Москва Туркияга 2,5 миллиард долларлик тўртта С-400 комплексларини муддатидан олдин етказиб берган.
Қўшма Штатлар бир неча бор келишувга қарши чиқиб, Туркияга С-400 ўрнига Американинг Патриот комплексини сотиб олишни таклиф қилди. Россия мажмуаларининг сотиб олиниши Дональд Трамп президентлиги даврида Анқара ва Вашингтон ўртасидаги муносабатларнинг совуқлашишига ва АҚШ томонидан Туркияга қарши санкцияларни киритиш бўйича такрорий таҳдидларга олиб келди.
Изоҳ (0)