Сурия президенти Аҳмад аш-Шаръа “Мусулмон биродарлар” ҳаракатига алоқадорлиги ҳақидаги даъволарни рад этди ва ўзини “ИШИД террорчилик ташкилотининг асосий қурбони” деб атади. Бу ҳақда Al Arabiya Кувайтнинг “Ал-Нахар” газетасига асосланиб маълум қилмоқда.
Аш-Шаръа минтақадаги барча миллатчилик ва исломий ғоялар барбод бўлганини таъкидлаган.
Унинг сўзларига кўра, мамлакат ичидаги ҳар қандай бўлиниш чақириқлари фақат орзу бўлиб қолади, курдлар ва Сувайда вилояти аҳолиси билан эҳтимолий келишувлар эса фақат Сурия яхлитлиги доирасида муҳокама қилиниши лозим.
Сурия раҳбари Дамашқ сиёсати “қасосга эмас, бағрикенгликка асосланган”лигини таъкидлаган.
Аш-Шаръа Исроил билан муносабатларни нормаллаштириш ҳақидаги саволга жавоб берар экан, бу фақат Голан тепаликлари қайтарилгандан ва 1974 йилдаги келишув амалга оширилгандан сўнг мумкин бўлишини айтган.
“Бу шартлар бажарилмагунча, тинчлик келишуви ҳақида гап бўлиши мумкин эмас”, дея қўшимча қилди у.
Бундан аввал АҚШ Молия вазирлиги Сурияга қарши санкцияларни расман бекор қилди. Қарор президент Дональд Трампнинг июнь ойида Дамашққа қарши санкцияларни тугатиш ҳақидаги фармойишидан кейин қабул қилингани хабар қилинганди.
Суриянинг амалдаги президенти Аҳмад аш-Шараъа жорий йил сентябрь ойида АҚШнинг Нью Йорк шаҳрида бўлиб ўтадиган БМТ Бош ассамблеясида нутқ сўзлаши кутилмоқда.
Изоҳ (0)