АҚШ президенти Дональд Трамп Владимир Зеленский билан Оқ уйда учрашгани, учрашув таранг вазиятда якунлангани ҳақида хабар берилганди.
Украина раҳбари Киев ўт очишни тўхтатишга тайёр эмаслиги ва Вашингтондан хавфсизлик кафолатига муҳтож эканини айтганидан кейин вазият таранглашган. Трамп бунга жавобан шундай деди:
Сиз бизга мен буни хоҳлайман, буни хоҳламайман, деб айта олмайсиз. Бизсиз қўлингизда карталар йўқ, биздан миннатдор бўлишингиз керак. Биз сизга 350 миллиард доллар бердик, сиз ҳозир қийин аҳволдасиз. Мен урушни тўхтатмоқчи эмасман, дея олмайсиз. Ё биз бу битимни тузамиз ёки сиз ундан чиқиб кетасиз. Сиз миннатдорлик кўрсатмаяпсиз.
Зеленский Оқ уйни асабий қиёфада тарк этаётгани акс этган видеолар тарқалди.
Зеленский ва Трампнинг Оқ уйдаги мунозарасига дунёдаги сиёсатчилар турлича муносабат билдирди. Европанинг бир қатор раҳбарлари Украинани қўллаб-қувватлаган бўлса, америкалик сиёсатчилар Трампнинг ҳаракатларини ёқлаган.
Қуйида Зеленский ва Трамп учрашувига сиёсатчилар муносабатлари келтирилган.
АҚШ Ҳукумат самарадорлиги департаменти (DOGE) раҳбари Маск: “Зеленский Америка халқи назарида ўзини йўқ қилди”.
АҚШ молия вазири Бессент: “Президент Трамп, жаҳон саҳнасида Америка халқи ва мамлакатимизни ҳимоя қилганингиз учун ташаккур”.
Россия Хавфсизлик кенгаши раиси ўринбосари Дмитрий Медведев: “Овал кабинетда шиддатли баҳс. Трамп кокаин масхарабозига биринчи марта юзига ҳақиқатни айтди: Киев режими учинчи жаҳон уруши билан ўйнашмоқда. Ва ношукур чўчқа чўчқахона эгаларидан қаттиқ тарсаки олди. Бу фойдали. Аммо бу етарли эмас — биз нацистлар машинасига ҳарбий ёрдамни тўхтатишимиз керак”.
Украина президенти девони раҳбари Андрей Ермак: “Президент мамлакатимиз учун, адолатли ва мустаҳкам тинчликни ҳимоя қилаётган ҳар бир инсон учун курашмоқда. Мен қаҳрамон халқимиз манфаатларини ҳимоя қилаётган президентимизни қўллаб-қувватлайман. Ҳар қандай вазиятда. Нуқта. Атрофдагилардан миннатдормиз”.
Польша бош вазири Дональд Туск: “Ҳурматли Зеленский, азиз украиналик дўстлар, сиз ёлғиз эмассиз”.
Испания бош вазири Педро Санчес: “Украина, Испания сиз билан”.
Франция президенти Эммануэл Макрон: “Агрессор бор — бу Россия, қурбон бор — бу Украина. Биз ёрдам берган барчага миннатдорчилик билдиришимиз ва бошидан курашиб келаётганларни ҳурмат қилишимиз керак”.
Молдова президенти Майа Санду: “Ҳақиқат оддий. Россия Украинага ҳужум қилди. Россия агрессор. Украина ўз ва бизнинг эркинлигимизни ҳимоя қилади. Биз Украина биланмиз”.
“Украина — бу Европа! Биз Украина билан биргамиз. Биз Украина тажовузкорга қарши курашишда давом этиши учун уни қўллаб-қувватлашимизни кучайтирамиз”, деб ёзди Европа иттифоқининг ташқи сиёсат бўйича раҳбари Кажа Каллас ижтимоий тармоқда.
“Бугун эркин дунёга янги раҳбар кераклиги маълум бўлди. Биз, европаликлар, бу муаммони ҳал қилишимиз керак”, дея қўшмча қилди у.
Канада, Чехия, Латвия ва Литва ҳам Зеленскийни қўллаб-қувватловчи баёнотлар берди.
Изоҳ (0)