Жаҳон чемпионати саралаши доирасидаги бир қанча учрашувлар якунланди. Эрон ва Аргентина муддатидан аввал Мундиал йўлланмасини қўлга киритишни уддалади ҳамда мусобақа масаласини ҳал қилган жамоалар қаторига қўшилди.
25 март куни Осиё қитъасидаги саралаш босқичи А гуруҳидаги Эрон — Ўзбекистон баҳси бўлиб ўтди. Учрашувда 2:2 натижаси қайд этилди. Ушбу дурангдан кейин форслар ҳисобидаги очколар сони 20 та бўлди ҳамда 2026 йилги Мундиалга йўлланма олди.
Жанубий Америка мамлакатлари ўртасидаги Жаҳон чемпионати саралаши ҳам қизғин паллага етиб келди. 26 март тонгида ушбу қитъанинг икки номдор жамоаси — Аргентина ҳамда Бразилия терма жамоалари майдонга тушди. Унда мезбон Аргентина йирик 4:1 ҳисобида ғалаба қозонди ва 4 йилликнинг энг нуфузли мусобақасига борадиган мамлакатлар рўйхатига қўшилди.
2026 йилги Жаҳон чемпионати 3 та мамлакатда ўтказилади — АҚШ, Мексика ва Канада. Улар мезбон жамоа сифатида мусобақада иштирок этишади. Шунингдек, Осиё қитъасининг яна бир вакили Япония ҳам ЖЧ масаласини ҳал қилган. Янги Зеландия эса Океания минтақаси саралаш учрашуви финалида Янги Каледонияни мағлуб этиб, мундиалнинг 5-иштирокчисига айланган. Эрон 25 март куни Ўзбекистон билан дуранг ўйнади ҳамда 4 йилда бир марта ўтказиладиган мусобақанинг финал босқичига йўлланма олди. Аргентина эса йўлланмага эга чиққан 7-жамоага айланди.
Жаҳон чемпионати йўлланмасига эга чиққан жамоалар:
1. АҚШ (мезбон)
2. Мексика (мезбон)
3. Канада (мезбон)
4. Япония (Осиё)
5. Янги Зеландия (Океания)
6. Эрон (Осиё)
7. Аргентина (Жанубий Америка)
Маълумот учун, АҚШ, Мексика ва Канада майдонларида ўтадиган мусобақа учун Осиё қитъасига 8,5 та квота ажратилган. 3 та гуруҳдаги 1 ва 2-ўринларни эгаллаган жамоалар тўғридан тўғри йўлланма олса, гуруҳлардаги 3—4-ўриндаги жамоалар плей-оффлар орқали қолган 2,5 та йўлланма учун кураш олиб боради.
Изоҳ (0)