23 март куни Ўзбекистондаги онлайн савдо платформасида “Манчестер Сити” ва Ўзбекистон терма жамоаси ҳимоячиси Абдуқодир Ҳусановнинг имзоси сотувга қўйилди.
Эълон муаллифининг таъкидлашича, имзо 20 март куни Ўзбекистон — Қирғизистон терма жамоалари ўртасидаги баҳсдан кейин футболчининг ўзи томонидан қўйилган. Оддий қоғозга қўйилган имзо нархи 500 минг сўм этиб белгиланган.
Мазкур эълон ижтимоий тармоқларда катта шов-шувларга сабаб бўлди. Айримлар имзо сохталигини таъкидласа, бошқалар эса унинг ҳақиқий эканини билдиришди.
Ҳозирда эълон платформадан олиб ташланган. Имзо сотилган ёки сотувчи уни ўзида қолдиришга қарор қилганми — бу борада аниқ маълумот йўқ.
Маълумот учун, Абдуқодир Ҳусанов қишки трансфер ойнаси пайтида “Ланс”дан “Манчестер Сити” сафига кўчиб ўтди. Унинг клуб билан шартномаси 2029 йил ёзига қадар амал қилади. Transfermarkt портали футболчининг қийматини 35 миллион еврога баҳолаган.
Изоҳ (0)