“Ўзтемирйўлконтейнер” томонидан Ҳиндистондан Қозоғистонга биринчи поезд йўлга қўйилди, деб хабар бермоқда ташкилот ахборот хизмати.
Маълум қилинишича, транспорт йўлакларини кенгайтириш ва халқаро юк ташишларни ривожлантириш доирасида “Ўзтемирйўлконтейнер” АЖ, “ТУЛМ” ОАЖ ва “Кедентранссервис” АЖ ҳамкорлигида Ҳиндистондан Қозоғистонга биринчи контейнер поезди йўлга қўйилди.
Таркибида 12 та йигирма футлик контейнер бўлган поезд Ҳиндистоннинг Мундра портидан Қозоғистоннинг Сороковая станциясига Ҳиндистон—Эрон—Туркманистон—Ўзбекистон — Қозоғистон йўналишида ҳаракатланиб, 1 585 км денгиз орқали ва 4 300 км темир йўл орқали босиб ўтади.
2024 йилда ушбу йўналиш бўйлаб Ҳиндистондан Ўзбекистонга (Мундра — Сергели) 20 та йигирма футлик контейнер ташувлари муваффақиятли амалга оширилган эди.
“Ўзтемирйўлконтейнер” АЖ бошқарув раиси М.К. Мирхамидовнинг таъкидлашича, компания Ҳиндистон — Марказий Осиё мултимодал йўналишида мунтазам контейнер поездларини йўлга қўйишни режалаштирган. Бу ўз навбатида савдо алоқаларини мустаҳкамлаш ҳамда экспортёр ва импортёрлар учун янги имкониятлар яратишга хизмат қилади.
Қайд этилишича, “Ўзтемирйўлконтейнер” АЖ халқаро контейнер ташувларини фаол ривожлантиришни давом эттириб, мижозларга юкларни самарали ва ўз вақтида етказиб бериш учун янги логистика ечимларини таклиф қилмоқда.
Бундан аввал Тошкентдан First Dry Port Terminal терминали орқали контейнерли блок поезд Бразилияга йўлга чиққани ҳақида хабар берилганди. Юк поезди 11-декабрь куни жўнаб кетган бўлиб, таркибда жами 12 метрли 54 та контейнер бор (ҳар бирида 28 тонна карбамид мавжуд).
“Поезд Ўзбекистон, Туркманистон, Озарбайжон ва Грузия ҳудудларидан ўтади. Поти портида (Қора денгизнинг шарқий қисмидаги энг йирик порт) темирйўл платформаларидан контейнерларни кемага қайта юклаш ва денгиз орқали Паранагуа (Бразилия) портига етказиш режалаштирилган”, деган First Dry Port Terminal вакили.
Қайд этилишича, юклар Ўзбекистон кимё саноатида экспорт-импорт операциялари бўйича ягона агент — “Ўзкимёимпекс” компанияси томонидан юборилган.
Юклар манзилга, тахминан, 60-70 кунда етиб боради. Ўзбекистондан Поти портигача контейнерлар 20 кунда, денгиз орқали эса 35-45 кунда етказилиши режалаштирилган.
Изоҳ (0)