АҚШнинг қирғоқбўйи штатларида Vibrio vulnificus номли гўшт еювчи бактерияси билан зарарланиш ҳолатлари кўпаймоқда. Бу ҳақда The Daily Tribune хабар бермоқда.
Vibrio vulnificus мамлакат пляжларини тўлиқ эгаллаб олган. АҚШ касалликларни назорат қилиш ва олдини олиш марказлари (CDC) 11 штатда, жумладан, Флорида ва Луизианада инфекция тарқалганини тасдиқлаган. Бу штатларнинг ҳар бирида 20 ва 17 та ўлим ҳолати қайд этилган.
Оммавий ахборот воситаларида “гўшт еювчи” деб таърифланган бактерия илиқ шўр сувда яшайди ва хом денгиз маҳсулотларини истеъмол қилиш ёки очиқ яралар орқали организмга кириши мумкин. Ҳар бешинчи зарарланиш ҳолати 48 соат ичида ўлим билан якунланади.
Мутахассислар Vibrio vulnificusънинг ҳозирги тарқалишини иқлим ўзгариши билан боғламоқда — сув ҳароратининг кўтарилиши бактериянинг кўпайиши учун қулай шароит яратади. Касалликнинг дастлабки белгилари қусиш, ич кетиши ва терида пуфакчалар пайдо бўлиши билан намоён бўлади. Хавф гуруҳига иммунитети заиф ва сурункали касалликларга чалинган одамлар киради.
CDC очиқ жароҳатлар билан чўмилмасликни, денгиз маҳсулотларини яхшилаб пиширишни ва денгиз суви билан алоқадан сўнг ғалати белгилар пайдо бўлганда зудлик билан тиббий ёрдамга мурожаат қилишни тавсия этади. Бу сўнгги йиллардаги иккинчи йирик тарқалиш ҳисобланади. Бундан аввал 2023 йилда Шимолий Каролина ва Техасда ҳам шунга ўхшаш ҳолатлар қайд этилган эди.
Изоҳ (0)