Самарқанд вилоятида 1 апрелдан ичимлик ва оқова сув хизматлари янги тарифлари кучга киради. Халқ депутатлари вилоят кенгаши томонидан 24 март куни ичимлик суви таъминоти ва оқова сув хизматлари учун янги нархлар тасдиқланди.
Унга кўра, бир метр куб ичимлик суви нархи қуйидагича белгиланмоқда:
- аҳоли учун — 2800 сўм;
- бюджет ташкилотлари ва улгуржи истеъмолчилар учун — 6700 сўм.
Оқова сув хизмати:
- аҳоли учун — 1900 сўм;
- бюджет ташкилотлари ва улгуржи истеъмолчилар учун — 5300 сўм бўлади.
Бунда аҳоли ҳамда бюджет ташкилотлари ва улгуржи истеъмолчилар учун ичимлик ва оқова сув нархлари ҚҚСсиз ҳисобланган.
“Ўзсувтаъминот” берган маълумотга кўра, Ўзбекистонда 2025 йилда 715 минг аҳолига илк бор тоза ичимлик суви етиб боради. Жорий йилда 1 619 километр ичимлик суви, 521 километр оқова сув тармоқларини тортиш, тизимдаги 162 та иншоотни қуриш ва реконструкция қилиш режалаштирилган.
2025 йил январь ойи ҳолатига кўра, Ўзбекистон аҳолисининг 80,9 фоизи марказлашган ичимлик суви билан таъминланган. Сўнгги 6 йилда аҳолининг ичимлик суви таъминотини яхшилашга 10 триллион сўмга яқин маблағ йўналтирилди. Ушбу маблағлар ҳисобидан 1 176 та сув иншооти ва 20,8 минг километр ичимлик суви тармоқлари тортилди.
Ўзбекистонда 2026 йилда марказлашган ичимлик суви билан таъминланганлик 90 фоизга, оқова сув хизмати билан қамраб олинганлик даражаси 35 фоизга етказилади.
Изоҳ (0)