Футбол бўйича Жаҳон чемпионати саралашининг 3-босқичи 8-туридан ўрин олган учрашув бугун, 25 март куни бўлиб ўтди.
Теҳрондаги “Озоди” стадионида бўлиб ўтган баҳсда Ўзбекистон МТЖ Эронга қарши баҳс олиб борди.
Учрашув майдон эгалари фаоллиги остида бошланган бўлса-да кейинчалик ўзбекистонлик футболчилар устунликни қўлга олди. Бу эса 16-дақиқага келиб ўз самарасини берди. Ҳожимат Эркинов Фарруҳ Сайфиевнинг узатмасидан сўнг тўпни дарвозага йўллади ва ҳисобни очди.
Шундан сўнг эронликлар ҳужумларни кўпайтирди, бу вазиятларда Ўзбекистон МТЖ ҳимоячилари фаол ҳаракат қилди. Иккинчи бўлимга келиб мезбонлар яна фаол ҳаракат қилди. Ўзбекистонлик ҳимоячилар хатосидан сўнг тўп Таремига келиб тушди ва унинг дарвоза томон йўллаган зарбаси голга айланди.
Орадан бир дақиқа ўтар-ўтмас Эрон дарвозаси томон жарима зарбаси белгиланди. Аббосбек Файзуллаевнинг чамаси 35 метрлардан узатма аралаш зарбаси эса тўппа-тўғри дарвоза тўридан жой олди.
83-дақиқага келиб Тареми яна бир бор ҳисобни тенглаштирди. У ўзига узатиб берилган тўпни дарвозага аниқ йўллади.
Шундай қилиб Ўзбекистон МТЖ очколар сонини 17 тага етказиб, 2-ўринни мустаҳкамлади. Эрон эса Жаҳон Чемпионати йўлланмасини қўлга киритди.
ЖЧ—2026 саралаши
25 март, сешанба
Эрон — Ўзбекистон 2:2
Голлар: 0:1 — 16, Ҳожимат Эркинов, 1:1 – 52, Меҳди Торемий, 1:2 – 53, Аббосбек Файзуллаев, 2:2 – 83, Меҳди Торемий
Эрон: 1.Алиризо Бейронванд, 2.Солеҳ Ҳардани, 4.Шожаи Халилзода, 5.Милод Муҳаммадий, 6.Саид Иззатуллоҳий, 7.Алиризо Жаҳонбаҳш, 9.Меҳди Торемий, 10.Меҳди Ғоеди, 13.Ҳусайн Каъноний, 14.Саман Қуддус, 20.Сардор Азмун.
Ўзбекистон: 1.Ўткир Юсупов, 3.Ҳожиакбар Алижонов, 2.Абдуқодир Ҳусанов, 15.Умар Эшмуродов, 5.Рустам Ашурматов, 4.Фаррух Сайфиев, 9.Одил Ҳамробеков (17.Абдурауф Бўриев, 85), 7.Отабек Шукуров, 22.Аббосбек Файзуллаев, 20.Ҳожимат Эркинов (11.Русланбек Жиянов, 65), 14.Элдор Шомуродов.
Изоҳ (0)