Марказий банк февралда катта миқдорда олтин сотди

Ўтган ойда Ўзбекистон қарийб 1,7 млрд долларлик олтин экспорт қилди. Бу икки ойлик экспорт тушумларининг 37,3 фоизини ташкил этади.

Статистика агентлигининг маълум қилишича, 2025 йил январь февраль ойларида республика ташқи савдо айланмаси 10,8 млрд долларга етди (2024 йил мос давридагидан 9,9 фоиз кўп). Шундан экспорт ҳажми 4,6 млрд долларни (ўсиш 27,7 фоиз), импорт 6,2 млрд долларни (0,6 фоиз камайди) ташкил этди. Ҳисобот даврида 1,55 млрд долларлик ташқи савдо тақчиллиги юзага келган. 2024 йилнинг дастлабки икки ойида ташқи савдо дефицити 2,6 млрд доллар эди.

Экспорт таркиби

Икки ойлик экспорт таркибининг энг юқори улуши олтин сотувига тўғри келган — 37,3 фоиз. Марказий банк февралда қарийб 1,73 млрд долларлик қимматбаҳо металлни хорижга экспорт қилган (январда олтин сотилмаган). Бунда олтин сотуви ўтган йилнинг февралидагига нисбатан (1,3 млрд долларлик олтин сотилган) 35 фоизга кўпайган.

Икки ой ичида хизматлар экспорти кескин (61,5 фоиз) ошиб, 1,2 млрд долларни ташкил этган. Бу умумий экспорт тушумларининг 25,3 фоизига тенг.

Январь февраль ойларида Ўзбекистоннинг товарлар ва хизматлар экспорти бўйича асосий ҳамкорлари Россия (11,8 фоиз), Хитой (6,5 фоиз), Афғонистон (4,5 фоиз), Қозоғистон (4 фоиз) ва Туркия (3,9 фоиз), бўлган.

Жорий қиш мавсумида мамлакатда газ тақчиллиги кучли сезилди. Айниқса, заправкаларда метан ёнилғиси етишмовчилиги ҳар йилгидан узоқроқ давом этди. Ички бозорда газга бўлган талаб юқори бўлишига қарамай, январь февраль ойларида мазкур маҳсулот экспорти ҳажми 57,3 фоизга ошган ва 42 млн долларлик газ хорижий давлатларга сотилган. Ўтган йилнинг мос даврида бу рақам 26,7 млн доллар бўлган.

Ҳисобот даврида электр токи экспорти ўтган йил мос пайтидагига қараганда кескин — 114,7 фоизлик ўсиш қайд этди. Яъни Ўзбекистон январь февраль ойларида чет давлатларга 34,3 млн долларлик ток сотган.

Импорт таркиби

Импорт қилинган товарларнинг энг кўп улуши машиналар ва транспорт асбоб ускуналари ҳиссасига тўғри келган — 2,4 млрд доллар (ўсиш 2,2 фоиз). Бу умумий импортнинг 36,8 фоизига тенг.

Кейинги ўринда саноат товарлари бўлиб (жами 16,5 фоиз), икки ойда хориждан салкам 1,1 млрд долларлик шу тоифадаги маҳсулотлар харид қилинган.

Январь февраль ойларида 787,1 млн долларлик кимёвий воситалар ва шунга ўхшаш маҳсулотлар импорт қилинган. Бу умумий импортнинг 12,2 фоизи дегани.

Транспорт воситалари импорти таркибидаги энг юқори улуш автомобилларда. Икки ой ичида хориждан 459,5 млн долларлик автомашиналар ва уларнинг қисмлари келтирилган.

Ҳисобот даврида 35,8 млн долларлик табиий газ импорт қилинган бўлиб, бу ўтган йилнинг мос давридагидан 66,2 фоизга кам.

Икки ойда экспорт қилинганидан кўпроқ — 43,5 млн долларлик электр токи импорт қилинган. Хизматлар импорти таркибидан сафарлар улуши юқори бўлган — 398,2 млн доллар.