Ўзбекистон терма жамоа аъзоси ва Эроннинг “Персеполис” клуби футболчиси Остон Ўрунов машғулотларга қайтди.
Клуб кеча ўз Instagram саҳифасига юклаган расмда Остон машғулотларда иштирок этаётгани тасвирланган.
Ярим ҳимоячи 21 январь куни Эрон чемпионати доирасидаги “Зобаҳан”га қарши баҳсда жароҳат олиб майдонни тарк этган эди. Учрашувдан кейинги текширувда Ўруновнинг жароҳати анча жиддийлиги ва у камида 5 ҳафтани ўтказиб юбориши айтилганди.
Шундан кейин Остон “Персеполис”нинг 7 та баҳсида қатнаша олмади. Теҳрон клуби кейинги учрашувни 7 март куни сафарда “Чадормалу”га қарши ўтказади. Ўрунов эса катта эҳтимол билан заҳирадан майдонга тушади.
Ўзбекистон терма жамоаси март ойида Жаҳон чемпионати саралаши доирасида Тошкентда Қирғиз Республикаси ва сафарда Эронга қарши майдонга тушади.
Миллий жамоа аъзоси Остон Ўрунов эса мазкур баҳсларгача ўз формасини тиклаб олади ва катта эҳтимол билан учрашувларда майдонга тушади.
Изоҳ (0)