Ўзбекистон терма жамоаси Жаҳон чемпионати саралаши 8-тури доирасида Эронга қарши майдонга тушади. Учрашув олдидан ўтказилган матбуот анжуманида футболчи Аббосбек Файзуллаев иштирок этиб, журналистлар саволларига жавоб қайтарди.
Футболчи Эронга қарши баҳс қийин ўтиши ҳамда Ўзбекистон Теҳронга 3 очко қўлга киритиш учун келганини айтди.
Бизни жуда қийин баҳс кутиб турибди. Иккита тенг савиядаги жамоалар тўқнаш келмоқда. Биз Теҳронга ғалаба учун келганмиз. Насиб қилса, эртага бор кучимиз билан ҳаракат қилиб, 3 очкони қўлга киритамиз. Топ чемпионатлардан бўлаётган таклифлар? Ҳозир бу саволга жавоб берадиган пайт эмас, сабаби эртага бизни муҳим баҳс кутиб турибди. Ҳозир бор эътиборни терма жамоага қаратганман, дейди Файзуллаев.
Маълумот учун, ҳозирда Ўзбекистон терма жамоаси А гуруҳида 16 очко билан 2-ўриндан жой олган. 19 очко тўплаган Эрон эса етакчилик қилмоқда.
Ушбу жамоалар ўртасидаги баҳс 25 март, сешанба куни Тошкент вақти билан 21:00 да бошланади.
Изоҳ (0)