Мудофаа вазирлиги ҳарбий хизматчилари АҚШда бўлиб ўтган “Энг илғор жангчи-2025” мусобақасида ғолиб бўлди, деб хабар бермоқда вазирлик матбуот хизмати.
-irJelzRH.avif)
Маълум қилинишича, 17–20 март кунлари АҚШнинг Миссисипи штати Camp Shelby ҳарбий-ўқув базасида бўлиб ўтган мусобақада Ўзбекистон Мудофаа вазирлиги ҳарбий хизматчилари — кичик сержант Абдуллаев Алишох ва III-даражали сержант Жовкашев Шоҳрух иштирок этди.
Халқаро ҳарбий ҳамкорлик алоқаларини мустаҳкамлаш ва махсус бўлинмаларда хизмат қилиш нуфузини ошириш каби мақсадларда ташкил этилган мусобақада ҳарбий хизматчилар АҚШ Миллий гвардиясининг махсус бўлинмалари ҳарбий хизматчилари билан куч синашди.
-7tTCzIyB.avif)
Мусобақа давомида ҳарбий хизматчилар якка таркибда жисмоний тайёргарлик синовлари (6 та машқни ўз ичига олган Фитнес тест), жисмоний ва руҳий зўриқиш йўлагидан ўтиш, тунда 15 километр масофага ориентирлаш, 15 килограмм юк билан 20 километр масофага марш югуриш, жанговар ва умумий тайёргарлик бўйича тест синовлари, иншо ёзиш (ҳарбий ҳамкорлик мавзусида 500 тадан кам бўлмаган сўз), артиллерия оловини бошқариш, АҚШ намунасидаги ўқотар қуролларни нотўлиқ қисмларга ёйиш, йиғиш ва жанговар ҳолатга келтириш, шунингдек, улардан турли усул ва шароитларда ўқ отиш, тиббий тайёргарлик, оммавий қирғин қуролларидан ҳимояланиш, кутилмаган (сюрприз) машқлар каби шартларни муваффақиятли бажарди.
Ўзбекистонлик ҳарбий хизматчилар жамоавий баҳс — 15 килограмм юк билан 20 километр масофага марш югуриш шартини 1 соат 50 дақиқа ичида бажарди. Шунингдек, якка тартибдаги баҳсларда III-даражали сержант Жовкашев Шоҳрух 3 километр 219 метр масофани 11 минут 18 сонияда босиб ўтган бўлса, кичик сержант Абдуллаев Алишох 250 метр масофага югуриш давомида мажмуавий машқларни 1 дақиқа 18 сонияда бажариб, 5 килограмм оғирликдаги коптокни 12,3 метр масофага улоқтирган. Мазкур шартларнинг барчасида ҳарбий хизматчилар мусобақа рекордини янгилади.
Ғолиб ҳарбий хизматчилар мусобақанинг махсус соврини билан тақдирланди. Улар 23 март куни Тошкентда тантанали равишда кутиб олинди.
Вазирлик матбуот хизматининг қайд этишича, мазкур мусобақада ўзбекистонлик ҳарбий хизматчилар 2019 йилдан бери муваффақиятли қатнашиб, ҳар бирида иштирокчилардан мутлақ устунлик билан ғолибликни қўлга киритиб келади.
Изоҳ (0)