Ижтимоий тармоқларда Тошкент—Самарқанд йўналиши бўйича кетаётган Шарқ поездидан топилган сувараклар ҳақида хабарлар тарқалди. “Ўзбекистон темир йўллари” мазкур хабарларга муносабат билдирди.
Унда таъкидланишича, бу маълумот ёлғон ва ҳақиқатга тўғри келмайди. Хабарда ишлатилган фотосуратлар бошқа йўналиш — Тошкент—Волгоград поездига бағишланган эски нашрдан олинган. Ушбу суратларнинг Шарқ поезди билан ҳеч қандай алоқаси йўқ.
Улардан ушбу контекстда фойдаланиш фактларни манипуляция қилишдир.
Биз йўловчиларимизнинг қулайлиги ва хавфсизлиги ҳақида қайғурамиз ва мунтазам равишда барча поездлар, жумладан, “Шарқ” поездларида санитария меъёрларига риоя этилиши устидан назоратни кучайтирган ҳолда кўрикдан ўтказамиз.
Биз асосли фактларни тақдим этишга ва жамиятни мақсадли равишда чалғитмасликка чақирамиз, дейилади муносабатда.
2023 йилда россиялик блогер Илья Варламов “Ўзбекистон темир йўллари” акциядорлик жамияти хизмат кўрсатиш сифатини танқид қилганди.
Блогернинг таъкидлашича, у Самарқанд—Тошкент йўналишидаги поезднинг люкс вагонига 100 долларга билет харид қилган.
“Тезюрар поездда билет қолмагани сабабли оддий поезднинг люкс вагонидан жой олдим. Лекин Ўзбекистонда вагонларнинг бир-биридан фарқи йўқ, шекилли”, деб изоҳ қолдирган блогер.
Мазкур ҳолат юзасидан тезкор йиғилиш ўтказилган. Кўрсатилган камчиликлар юзасидан ушбу санада хизмат вазифасини олиб борган вагон кузатувчилари ва поезд бошлиғига қатъий интизомий жазо қўлланган, йўловчи поездларда сервис ва хизмат кўрсатиш қоидалари ҳақида қайта кўрсатмалар бериб ўтилган.
Изоҳ (0)