“Пахтакор” клуби президентининг спорт ишлари бўйича маслаҳатчиси Максим Шацких Қозоғистоннинг Спорц24.кз нашрига интервью бериб, ўзбек футболининг икки юлдузи – “Манчестер Сити” ҳимоячиси Абдуқодир Ҳусанов ва “Рома” ҳужумчиси Элдор Шомуродов ҳақида фикр билдирди. Шунингдек, у Ўзбекистон терма жамоасининг 2026 йилги Жаҳон чемпионатига чиқиш имкониятларини баҳолади.
“Ҳусанов – “Манчестер Сити”нинг келажаги”
— Максим Александрович, “Манчестер Сити” ҳимоячиси Абдуқодир Ҳусановнинг ўйинига қандай баҳо берасиз? Унинг “Челси”га қарши дебюти бир оз омадсиз бўлди, аммо кейинчалик у асосий таркибдан мустаҳкам жой эгаллади.
— Хатолар уни синдирмайди, Ҳусанов шундай характерга эга футболчи ҳисобланади. Ҳар қандай ҳимоячи, ҳатто энг кучлилари ҳам хатога йўл қўяди. Муҳими, бу хатодан сўнг ўзини йўқотиб қўймади. У “Манчестер Сити”га келибоқ “Челси”га қарши майдонга тушди. Хато қилдими, уни дарҳол унитади ва кейинги ўйинга кучлироқ бўлиб қайтишга ҳаракат қилади. Ҳусанов — ўзига ишончи юқори бўлган футболчи. У руҳий босим остида ҳам барқарор ўйнай олишини бир неча бор исботлаган. Шу сабаб мен унинг кейинги ўйинларида ҳеч қандай муаммо бўлмаслигига ишонардим. Шундай ҳам бўлди – у кейинги ўйинларни анча барқарор ўтказмоқда.
— Пеп Гвардиола ҳам Ҳусанов ҳақида илиқ фикр билдирди. Сизнингча, “Сити”нинг ушбу трансфер тўғри танлов бўлдими?
— Албатта! Ҳусанов – бу нафақат “Сити”нинг, балки Ўзбекистон футболининг ҳам келажаги. У эндигина 20 ёшда ва олдинда катта имкониятлар турибди. Мен уни яхши билганим учун айтишим мумкинки, Абдуқодир келажакда топ даражадаги ҳимоячи бўлиши аниқ.
“Шомуродов “Рома”нинг февраль ойидаги энг яхши футболчиси бўлишга ҳақли эди”
— Элдор Шомуродов февраль ойида “Рома”нинг энг яхши футболчиси деб топилди. Бу ҳақида қандай фикрдасиз?
— Бу Элдор учун катта ютуқ! “Рома” Европанинг кучли жамоаларидан бири ва у узоқ вақт асосий таркибдан жой ололмай келаётганди, лекин февраль ойида яна сафга қайтиб, асосий таркибда майдонга тушишни бошлади. У ўз имкониятидан максимал фойдаланди: голлар урди, ассистлар берди ва жамоага катта фойда келтирди. Шу боис у “Рома”нинг февралдаги энг яхши футболчисига айлангани адолатли қарор. Бу нафақат “Рома”, айниқса Ўзбекистон терма жамоаси олдида муҳим баҳслар турган паллада жуда катта плюс бўлади.
— Тажрибали мураббий Клаудио Ранерининг келиши Шомуродовнинг ўйинига таъсир қилган бўлиши мумкинми?
— Балки! Чунки улар олдин “Кальяри”да ҳам бирга ишлаган. Ҳозирда Шомуродов ва Довбик “Рома”нинг асосий ҳужумчилари ҳисобланади. Ранери уларни ўзаро алмашиб туширишга ҳаракат қилмоқда. Мураббий ҳар иккала футболчига ҳам имконият бермоқда. У Довбик ва Шомуродовнинг деярли бир хил даражадаги ҳужумчилар эканини тушунади. Бу мутлақо нормал ҳолат! Нега энди йўқ? Нега ротация қилмаслик керак? Ротация – ҳам футболчилар учун, ҳам жамоа натижалари учун фойдали. Қайд этиш керакки, “Рома” Ранери қўл остида кетма-кет 11 та ўйинда мағлуб бўлмаяпти.
“Ўзбекистон терма жамоасининг Жаҳон чемпионатига чиқиш имконияти катта”
— Ўзбекистон терма жамоаси олдида муҳим саралаш ўйинлари турибди. Ҳусанов – ҳимояда, Шомуродов – ҳужумда етакчи сифатида майдонга тушмоқда. Бу жамоанинг имкониятларини оширадими?
— Ҳа, айнан шундай! Ўзбекистон терма жамоаси ҳозир яхши ҳолатда. Гуруҳда юқори ўринларни эгаллаш учун имкониятлар етарли. Агар Ўзбекистон саралаш босқичининг кейинги ўйинларида камида 4 очко олса, бу Жаҳон чемпионатига чиқиш учун етарли бўлиши мумкин. Мен шахсан Ўзбекистон терма жамоаси катта муаммоларсиз Жаҳон чемпионатига чиқишига ишонаман. Саралашда яна 4 та ўйин бор, ҳозирги турнир жадвали шуни кўрсатмоқдаки, ҳатто 1 ғалаба ва 1 дуранг мундиал йўлланмаси учун кифоя қилиши мумкин.
Ҳозирда А гуруҳида Эрон 1-ўринда, Ўзбекистон эса 2-ўринда бормоқда. Демак, 4 очко жамоага Жаҳон чемпионатига чиқиш учун етарли бўлади?
— Назарий жиҳатдан, ҳа! Аммо ҳар бир ўйинга ғалаба учун чиқиш керак. Очколарни эса якунда санаб чиқишади. Ўзбекистон терма жамоаси ўз олдига Жаҳон чемпионатига чиқиш мақсадини қўйган ва бунга эришиш учун барча имкониятларга эга.
Изоҳ (0)