Эроннинг Football360 нашри “Ўзбекистон терма жамоаси легионерлари билан танишинг: улар биздан ўтиб кетди” номли мақолани эълон қилди. Қуйида уни тўлиғича ўқишингиз мумкин.
2026 йилги Жаҳон чемпионати саралашининг 3-босқичи, 8-тур доирасида А гуруҳи етакчилари — Эрон ва Ўзбекистон терма жамоалари 25 март, сешанба куни ўзаро тўқнаш келади.
Ҳозирда Амир Галенои бошчилигидаги Эрон терма жамоаси 19 очко билан пешқадам бўлиб турган бўлса, Ўзбекистон 16 очко билан иккинчи ўринда ва форсларнинг асосий таъқибчиси ҳисобланади.
Ўзбекистон легионерлари сони ва уларнинг клубидаги ўрни
Сўнгги йилларда Ўзбекистон футболи сезиларли ўсишга эришди. Бош мураббий Темур Кападзе март ойидаги йиғинга 26 нафар футболчини терма жамоага чақирди, уларнинг 10 нафари легионерлар бўлиб, ҳар бири ўз жамоасида муҳим футболчилар ҳисобланади.
Ўзбекистон терма жамоасидаги легионер футболчилар 7 та лигада тўп тепади:
- Эрон (3 нафар — Ўткир Юсупов, Жалолиддин Машарипов, Остон Ўрунов);
- Россия (2 нафар — Аббосбек Файзуллаев, Рустам Ашурматов);
- Саудия Арабистони (1 нафар — Отабек Шукуров);
- БАА (1 нафар — Ҳожимат Эркинов);
- Италия (1 нафар — Элдор Шомуродов);
- Англия (1 нафар — Абдуқодир Ҳусанов);
- Озарбайжон (1 нафар — Бобур Абдухолиқов).
Эрон чемпионати бу рўйхатда етакчилик қилмоқда. Бироқ Машарипов дисквалификация туфайли Эронга қарши ўйнамайди, Ўрунов эса жароҳати сабаб ўйинни ўтказиб юбориши мумкин.
Ўзбекистон футболидаги иккита катта ном ажойиб мавсум ўтказмоқда:
- Абдуқодир Ҳусанов — 21 ёшли футболчи қишки трансфер ойнасида “Ланс”дан “Манчестер Сити” сафига қўшилди ва Пеп Гвардиола қўл остида шуғулланмоқда. Ҳимоячи ҳозирда “шаҳарликлар”нинг асосий таркиб футболчиси ҳисобланади.
- Элдор Шомуродов — “Оқ бўрилар” сардори “Рома” ҳужум чизиғида ёрқин ўйин кўрсатмоқда. У ҳозирда ажойиб формада бўлиб турибди.
Ҳозирги кунда Ўзбекистондан икки нафар футболчи Европанинг топ-5 лигасида тўп сураётган бўлса, Эрондан фақат битта — Меҳди Тареми (“Интер”). Аммо унинг Италия чемпионатидаги ишлари яхши эмас.
Легионерларнинг Ўзбекистон терма жамоасидаги роли
Ўзбекистоннинг Қирғизистонга қарши охирги учрашувида асосий таркибда майдонга тушган 7 нафар футболчи легионер эди:
- Ўткир Юсупов (“Фулад”)
- Абдуқодир Ҳусанов (“Манчестер Сити”)
- Рустам Ашурматов (“Рубин”)
- Отабек Шукуров (“Ал-Фейҳа”)
- Аббосбек Файзуллаев (“ЦСКА”)
- Жалолиддин Машарипов (“Истиқлол”)
- Элдор Шомуродов (“Рома”)
БААга қарши ўйинида Эрон таркибида беш нафар легионер ҳаракат қилди:
- Саман Ғоддос (“Иттиҳод Калба”)
- Меҳди Гаеди (“Иттиҳод Калба”)
- Сардор Азмун (“Аш-Шабаб”)
- Муҳаммад Моҳеби (“Ростов”)
- Алиризо Жаҳонбаҳш (“Ҳереван”)
Бу ҳолат Ўзбекистон футболчилари халқаро тажрибага эга бўлиб бораётганини ва улар ўз олдига катта мақсадлар қўяётганини кўрсатади. Эронга қарши баҳс эса жамоанинг жаҳон миқёсидаги имкониятларини яна бир бор синовдан ўтказади.
Изоҳ (0)