Ўзбекистон 2025 йил бошида озиқ-овқат нархлари индексида 139 мамлакат орасида 18-ўринни эгаллади, деб ёзмоқда Ranking.
Озиқ-овқат нархлари индекси турли мамлакатлардаги истеъмол саватчасининг нисбий нархини акс эттиради ва Нью Йоркдаги нархларни 100 фоиз деб қабул қилади. Шунга кўра, индекс кўрсаткичи қанчалик паст бўлса, мамлакатдаги маҳсулотлар Нью Йоркка нисбатан арзонроқ эканини ифодалайди ва аксинча.
Ўзбекистонда ушбу индекс 26,6 фоизни ташкил этди. Бу Ўзбекистондаги озиқ-овқат нархлари Нью Йоркдаги нархларнинг 26,6 фоизини ташкил этишини билдиради, яъни бу маҳсулотлар Ўзбекистонда Нью Йоркдагига қараганда ўртача 73,4 фоизга арзон.
Рейтингга кўра, озиқ-овқат нархи бўйича дунёдаги “энг арзон” давлатлар Покистон, Афғонистон, Миср, Эрон ва Мадагаскар, “энг қиммат”лари эса АҚШ Виржиния ороллари, Швейцария ва Исландиядир.
МДҲ давлатлари орасида Ўзбекистондан юқори ўринларни Беларусь ва Украина эгаллаган, яъни бу мамлакатларда озиқ-овқат нархлари Ўзбекистонга нисбатан арзонроқ. Ўз навбатида, Қозоғистон, Қирғизистон, Озарбайжон, Молдова ва Арманистонда озиқ-овқат маҳсулотлари Ўзбекистонникидан қиммат экани кўрсатилган.
Аввалроқ Ўзбекистон ресторанларидаги нархлар МДҲда энг арзон деб топилганди. 2025 йилга мўлжалланган ресторан нархлари индекси бўйича мамлакатлар рейтингида Ўзбекистон 139 та давлат орасида 17-ўринни олганди. Сутли қаҳва ичимлиги — капучино арзонлиги бўйича Ўзбекистон дунёда 126 та давлат орасида 15-ўринни эгаллаганди.
Ranking Ўзбекистон жинсиларнинг арзонлиги бўйича дунё бўйича 98 та мамлакат ичида 21-ўринни, эркаклар чарм пойабзали бўйича — 72, кроссовкалар бўйича — 84, ёзги кўйлаклар бўйича — 75-ўринни эгаллаганини ҳам маълум қилганди.
Изоҳ (0)