Ўзбекистон бир йил давомида Францияга уран етказиб бериш учун Қозоғистон компанияси билан шартнома имзолади.
Қозоғистон компанияси 500 контейнер уран концентратини Санкт-Петербург орқали Францияга етказиб беради. Ўзбекистоннинг “Навоийуран” давлат корхонаси бу учун Қозоғистоннинг TOO Logistic Centre компаниясига 9 миллион евро тўлайди. Уран Франция жанубидаги Малвези коммунасига етказиб берилади.
Тариф бўш контейнерларни Франциянинг Марсель шаҳрига қайтариш нархини ўз ичига олади. Ташиш Санкт-Петербург портидан юк жўнатилган кундан бошлаб 15 кун мобайнида амалга оширилиши лозим
Шартнома учун дастлабки нарх 11 миллион еврони ташкил этган. Кейинчалик мазкур сумма камайтирилган. Уран 2026 йилнинг биринчи чораги охиригача ташилади. “Навоийуран” ҳозирда “Конвердин Enterпрайз” (АҚШ) ва “Камеко Корпорейшн” (Канада) қайта ишлаш корхоналарига уран ташиш бўйича пудратчи қидирмоқда.
11-13 март кунлари Ўзбекистон президенти Шавкат Мирзиёевнинг Францияга давлат ташрифи бўлиб ўтди. Ташриф доирасида Ўзбекистон билан Франция ўртасида Стратегик ҳамкорлик ўрнатиш тўғрисидаги қўшма декларация, шунингдек, молия-иқтисодиёт, инвестиция, таълим, маданий-гуманитар ва бошқа соҳаларга доир қатор ҳужжатлар имзоланди.
Ўзбекистон ва Франция компаниялари ўртасида 6,5 миллиард евролик қўшма лойиҳаларини амалга оширишни назарда тутувчи Инвестиция ва инновация соҳаларидаги ҳамкорлик дастури қабул қилинди. Президентнинг ташрифи доирасида Париж шаҳрида икки мамлакатнинг тегишли вазирлик ва идоралари ҳамда 100 га яқин етакчи компаниялари раҳбарлари иштирокида давра суҳбати бўлиб ўтган эди.
Изоҳ (0)