Қирғизистон президенти Садир Жапаров 24 март куни паспорт ишлаб чиқариш жараёнини ва янги “загран” паспортларни кўздан кечирди. Бу ҳақда “АКИпресс” хабар берди.
Маълум қилинишича, 3 ойдан сўнг Қирғизистонда амалдаги хорижга чиқиш паспортлари бланкаларини чиқариш тўхтатилади. Уларнинг ўрнига янгиларини чоп этиш бошланади.
Умумий фуқаролик паспортининг янги бланкаларининг дизайни ўзгартирилди. Энди унда Қирғизистон ва унинг диққатга сазовор жойларини акс эттирувчи қўшимча тасвирлар мавжуд. Жумладан, “Интимак Ордо” биносининг сурати ҳам жой олган. Ултрабинафша нурларда тасвирлар ўзгариб туради, шунингдек, Манаснинг тасвири туширилган голограммалар ҳам қўшилган.
Босмахона директори Қирғизистон паспортларини қалбакилаштиришдан ҳимоя қилиш даражаси дунёдаги энг яхши ўнталикка киришини айтди. Бу эса уларнинг халқаро талабларга жавоб беришини тасдиқлаётганини таъкидлади.
Президент матбуот хизматига кўра, 2024 йил якунига кўра Қирғизистонда 770 минг 103 та паспорт тайёрланган: 359 минг 221 та умумфуқаролик паспорти, 410 882 та ID-карта.
Маълумот ўрнида, 2025 йил январь ойида Қирғизистон дунёнинг энг кучли паспортлари рейтингида 68-ўринни эгаллаган. Мамлакат фуқаролари 30 та давлатга визасиз ташриф буюриши мумкин. Таққослаш учун, Марказий Осиёнинг бошқа давлатларининг рейтингдаги ўрни қуйидагича:
- Қозоғистон ушбу рейтингда 52-ўринда (46 мамлакатга визасиз режим);
- Ўзбекистон 68-ўринда (32 мамлакатга визасиз режим);
- Тожикистон 72-ўринда (27 мамлакатга визасиз режим);
- Туркманистон 76-ўринда (18 мамлакатга визасиз режим).
Паспорт шунчаки чегарадан ўтиш ҳужжати эмас. У мамлакатнинг маданияти, тарихи, миллий хусусиятларини акс эттирувчи муҳим рамз ҳисобланади. Баъзи давлатлар паспортларини нафақат амалий, балки эстетик жиҳатдан ҳам чиройли қилишга ҳаракат қилади. Улар бу орқали ўз миллий мероси ва маданиятини дунёга намойиш этади. Қуйида учта давлатнинг эътиборга молик паспортларини кўриб чиқамиз.
- Автралия
Паспорт саҳифаларида Австралиянинг 17 та асосий диққатга сазовор жойлари тасвирланган. Улуғвор Улуру қоясидан тортиб, ғаройиб Бангл-Бангл тоғ тизмаларигача акс этган. Шунингдек, мамлакатни рамзий равишда тасвирловчи рамзлардан кенгурулар бир саҳифадан бошқасига сакраб ўтади.
- Канада
Канада паспорти дунёдаги энг чиройли паспортлардан бири ҳисобланади. Унинг ташқи кўриниши оддий ва камтарона, тўқ кўк рангдаги муқова олтин Қироллик герби билан безатилган. Ички саҳифаларда эса Канада диққатга сазовор жойлари ва тарихий шахслар тасвирланган. Ултрабинафша нурларда тасвирлар янада жонланиб, ёрқин рангларда кўринади ва ҳажмга эга бўлади. Бу нафақат безак, балки хавфсизликни таъминловчи омил ҳамдир, чунки Канада паспортини қалбакилаштириш деярли имконсиз.
- Хитой
Хитой паспорти ўзининг оригиналлиги ва гўзаллиги жиҳатидан бошқа давлатлар паспортларидан қолишмайди. Ҳар бир саҳифада диққатга сазовор жойларнинг тасвирлари акс этган. У деярли сайёҳлик қўлланмасига айланган. Паспортларда — Шенси провинциясидаги Теракота армияси, Пекиндаги “Тақиқланган шаҳар”, Хайнан оролидаги кокос боғи, Макао шаҳридаги Сай Ван кўприги ва бошқа кўплаб машҳур жойлар.
Изоҳ (0)