Украина президенти Владимир Зеленский Оқ уйда америкалик ҳамкасби Дональд Трамп билан бўлган тортишувга муносабат билдирди.
Сиёсатчи вице-президент Жей Ди Венс ҳам иштирок этган тортишувдан афсусдалигини маълум қилди.
Афсуски, шундай бўлди. Ҳаммасини тўғрилаш вақти келди. Келгусидаги ҳамкорлик ва мулоқот конструктив бўлишини истардик. Фойдали қазилмалар ва хавфсизлик бўйича келишувга келсак, Украина уни исталган вақтда ва ҳар қандай қулай форматда имзолашга тайёр. Биз бу келишувни кўпроқ хавфсизлик ва ишончли хавфсизлик кафолатлари сари қадам деб биламиз ва у самарали ишлашига чин дилдан умид қиламан, деди Зеленский.
Шунингдек, Украина раҳбари ўз мамлакатининг тинчликка содиқлигини тасдиқлади.
Ҳеч биримиз охири йўқ урушни хоҳламаймиз. Украина мустаҳкам тинчликни яқинлаштириш учун имкон қадар тезроқ музокаралар столига ўтиришга тайёр. Ҳеч ким тинчликни украиналиклардан кўра кўпроқ хоҳламайди. Менинг жамоам ва президент Трампнинг кучли раҳбарлиги остида барқарор тинчликка эришиш учун ишлашга тайёрмиз, деди Украина президенти.
Унинг сўзларига кўра, можаронинг тугаши учун биринчи босқич гаровдагиларни озод қилиш ва ҳаво ҳудудида тинчлик ўрнатиш бўлиши мумкин. Бу ракеталар, дронлар, энергетика иншоотлари ва бошқа фуқаролик инфратузилмасига бомба ташлашни тақиқлашни, шунингдек, денгизда дарҳол сулҳ тузишни ўз ичига олади.
Изоҳ (0)