Дональд Трампнинг бож тарифлари инвесторларни ваҳимага солиб, ўз акцияларини кенг кўламда сотишга ундади. Натижада S&P 500 индекси ўтган ойдаги энг юқори кўрсаткичга нисбатан 4 триллион долларга пасайди.
Мутахассисларнинг таъкидлашича, Трампнинг тариф сиёсати Америка бизнеслари, истеъмолчилари ва инвесторлари орасида мавҳумликни кучайтирган. Бозордаги ишончга, айниқса, Канада, Мексика ва Хитой каби йирик савдо ҳамкорлари билан божхона тўловлари борасидаги кескинлик жиддий таъсир кўрсатмоқда.
Wealth Enhancement компанияси мутахассиси Аяко Ёшиока бозор кайфиятида сезиларли ўзгаришлар кузатилаётганини қайд этиб, илгари самарали бўлган ёндашувлар эндиликда иш бермаётганини айтди.
Душанба куни фонд бозоридаги сотувлар янада кучайди. S&P 500 индекси 2,7 фоизга пасайиб, йилнинг энг йирик кунлик йўқотишини қайд этди.
Технологик компаниялар устунлик қиладиган Nasdaq Composite эса 4 фоизга қулаб, 2022 йил сентябридан бери энг катта кунлик пасайишни кўрсатди. Натижада S&P 500 жорий йилнинг 19 февралида қайд этилган рекорд чўққисидан 8,6 фоиз пастга тушиб, бозор қийматидан 4 триллион доллардан ортиғини йўқотди. Nasdaq фонд биржаси эса декабрдаги энг юқори даражасидан 10 фоиздан ортиққа тушиб, техник жиҳатдан “коррексия” босқичига кирди.
Трамп ўтган дам олиш кунлари иқтисодий инқироз юзага келиши эҳтимоли ҳақида аниқ прогноз бермасликка ҳаракат қилди. Бироқ инвесторлар унинг савдо сиёсати салбий иқтисодий оқибатларга олиб келишидан хавотирда.
Хитой билан савдо келишмовчиликларини тушуниш мумкин, бироқ Канада, Мексика ва Европа билан тариф можаролари анча чалкашлик туғдиряпти. Агар муаммолар тез орада ҳал қилинмаса, бу АҚШ иқтисодий истиқболлари ва бирлашма-сотиб олиш (М&А) фаолиятига жиддий зарар етиши мумкин, деди Лазард компанияси бош директори Питер Орзаг.
Бозор пасайишининг таъсири компанияларга ҳам сезилмоқда. Delta Air Lines биринчи чоракдаги фойда прогнозини икки баравар қисқартирди, натижада унинг акциялари 14 фоизга қулади. Бош директор Эд Бастиан бунга Қўшма Штатлардаги иқтисодий ноаниқликнинг кучайишини сабаб қилиб кўрсатган.
Инвесторлар, шунингдек, 12 март куни эълон қилинадиган инфляция ҳисоботини ҳам диққат билан кутишмоқда.
Бошқа президентлик маъмуриятлари одатда фонд бозорига сезиларли таъсир кўрсатишдан қочарди, аммо Трамп маъмурияти бунга нисбатан лоқайдроқдек кўринмоқда. Улар фонд бозорининг тушишига ва ҳаттоки иқтисодий турғунлик эҳтимолига кўпроқ тайёр бўлиши мумкин. Бу эса Уолл Стрит учун сергаклантирувчи жиддий сигнал бўлиши керак, дейди Baird компаниясининг инвестиция стратегияси бўйича мутахассиси Росс Майфилд.
Мутахассислар фонд бозоридаги тушкун кайфият АҚШ ялпи ички маҳсулотининг қисқаришига олиб келишидан хавотирда.
Изоҳ (0)