АҚШ суди Колумбия университети талабаси, фаластинлик Маҳмуд Халилни депортация қилиш бўйича қарорни вақтинча блоклади. У Исроилнинг Ғазодаги ҳаракатларини қоралаб намойишда қатнашгани учун Қўшма Штатлардан чиқариб юборилиш хавфи билан юзлашяпти.
Унинг ҳибсга олиниши Фаластин тарафдори бўлган фаоллар Трамп маъмурияти томонидан жиддий босимга учраётган бир вақтда юз бермоқда.
АҚШ президенти Дональд Трамп талабани “ҲАМАСнинг хорижлик радикал тарафдори” деб атаб, ўзининг ижтимоий тармоқ саҳифасида қоралади. Шунингдек, ҳибсга олишлар давом этишини айтди.
Маҳмуд Халилнинг адвокатларига кўра, у депортация жараёни якунлангунга қадар Луизианадаги муҳожирлар федерал қамоқхонасига жўнатилган.
Намойишлар ва норозиликлар
Нью Йоркда юзлаб намойишчилар кўчага чиқиб, Маҳмуднинг қўлга олиниши сўз эркинлигига ҳужум эканини таъкидлади. Манхеттенда полиция ва намойишчилар ўртасида кичик тўқнашув бўлиб ўтди, камида бир киши ҳибсга олинди. Бироқ штат бош прокурори ва Америка Фуқаролик Эркинликлари Иттифоқи (АCLU) фаластинлик талабани қўллаб-қувватлади.
АҚШда доимий яшаш ҳуқуқига эга бўлган фаластинлик талаба ўтган ҳафта охирида қўлга олинди. У 2024 йил Колумбия университетида бошланиб, бутун дунёга ёйилган Исроилга қарши оммавий акция етакчиларидан эди.
Маҳмуднинг бахтига, АҚШ округ суди судьяси Жесси Ферман унинг депортациясини кейинги фармойишга қадар тўхтатиб қўйди. Талабанинг адвокатлари судьядан, шунингдек, уни Нью Йоркка қайтаришни ҳам сўради. Ҳуқуқшуносларнинг фикрича, расмийлар Маҳмудни ҳимоячиларидан узоқлаштириш учун атайин бошқа штатга жўнатган.
Оқ уй Маҳмуд Халилга нисбатан бирор расмий айблов қўйилгани ҳақида маълумот бермади. Аммо Дональд Трамп унинг Қўшма Штатларда бўлиши “миллий ва халқаро манфаатларга зид” эканлигини ёзган.
Трамп университетларга босим қилмоқда
7 март куни Дональд Трамп Колумбия университети учун 400 миллион доллар федерал грант бекор қилишини эълон қилди. Бунга сабаб қилиб кампусдаги “антисемитизм ҳолатлари” кўрсатилди.
Шундан сўнг АҚШ Таълим вазирлиги Гарвард, Ел каби жами 60 та олийгоҳга хат юбориб, кампусларда антисемитизмга қарши чоралар кўришни сўради. Вазирлик бундай қилмаган муассасалар учун федерал молиялаштириш қисқаришидан огоҳлантирган.
АҚШ Ички хавфсизлик вазирлиги агентлари Маҳмудни Қўшма Штатлар фуқаролигига эга ҳомиладор рафиқаси кўз ўнгида қўлга олган. Адвокат Эми Грирнинг сўзларига кўра, агентлар аввалига унинг талаба визаси бекор қилинганини айтишган. Рафиқаси уларга Маҳмуднинг “яшил карта”си (Green cард) борлигини кўрсатгач, агентлар ушбу ҳужжатни ҳам бекор қилинган деб айтишган.
Душанба куни Колумбия университети яҳудий профессорлари фаластинлик талабанинг ҳимояси учун митинг ва матбуот анжумани ўтказди. Улар “Яҳудийлар депортацияларга қарши” ёзуви туширилган плакатлар кўтариб чиқишди.
Изоҳ (0)