Украина президенти ва унинг жамоаси Американинг юқори мартабали дипломатлари билан музокаралар учун Саудия Арабистонига келди.
Зеленский 10 март куни ифторликдан сўнг Саудия валиаҳд шаҳзодаси билан қисқа учрашув ўтказди. Маҳаллий манбаларнинг ёзишича, Муҳаммад бин Салмон унинг мамлакати Украина инқирозини ҳал қилиш ва тинчликка эришишга қаратилган барча халқаро саъй-ҳаракатларни қўллаб-қувватлашини билдирган.
Айни вақтда АҚШ давлат котиби ҳам Жидда шаҳрида бўлиб турибди. Бироқ Sky News нашрининг ёзишича, у Зеленский билан учрашмайди. Бунинг ўрнига Марко Рубио Саудия валиаҳд шаҳзодаси билан Яман ҳусийларининг савдо кемаларига таҳдиди, Сурия ва Ғазони қайта қуриш масалаларини муҳокама қилади.
Киев АҚШ ёрдамини қайта тиклашга умид қилмоқда
Хабар қилинишича, Украина делегацияси америкалик ҳамкасбларини Оқ уйдаги даҳанаки жангдан сўнг тўхтаб қолган ҳарбий ва разведка ёрдамини тиклашга кўндирмоқчи бўлади.
Марко Рубио Жиддага йўл олгач, журналистларга интервью бериб, агар Украина ва АҚШ Трамп маъмурияти учун мақбул келишувга эришса, Киевга нисбатан қўйилган чекловлар олиб ташланишини маълум қилди.
Биз улар тинчлик музокараларига киришмоқчими, шуни билмоқчимиз. Бу уруш Украина учун жуда қимматга тушди ва қонли бўлди, деди Рубио.
Унинг таъкидлашича, “Украина халқи улкан азоб-уқубат чеккани боис Россия билан муроса ҳақида гапириш жуда қийин. Аммо урушни тугатишнинг шундан бошқа йўли йўқ”.
Мен уларга ҳеч қандай шарт қўймайман. Биз шунчаки уларнинг қандай позицияда эканини тингламоқчимиз, кейин эса бу позицияни Россиянинг талабларига солиштириб, орадаги тафовутни аниқлаймиз, дея қўшимча қилган АҚШ давлат котиби.
Рубио, шунингдек, Украина Россия 2014 йилдан бери эгаллаб турган ҳудудларнинг бир қисмини бериши кераклигини, акс ҳолда урушни тугатиш бўйича келишув имконсиз бўлишини таъкидлади.
Аввалроқ Дональд Трамп Зеленский манзилига танқид ёғдириб, уни АҚШ ёрдамини “боладан конфетни тортиб олгандек” қабул қилишда айблаганди.
Изоҳ (0)