Франция президенти Эммануэл Макрон ядро қуролидан фойдаланиш бўйича музокаралар бошланишини, Россия агрессияси “чегара билмаслигини” айтган эди. Росия ташқи ишлар вазири Сергей Лавров буни ўз мамлакатига нисбатан таҳдид деб баҳолади. Бу ҳақда “РИА Новости” хабар берди.
Макрон 6 мартдаги нутқида ҳарбий бюджетни оширишни давом эттиришга ваъда берди. Шунингдек, у бутун Европа иттифоқини ҳимоя қилиш учун француз ядро қуролидан фойдаланиш бўйича мунозара бошлашни таклиф қилди.
Албатта, бу Россияга қарши таҳдиддир. У бизни таҳдид деб ҳисоблаб, Европа мамлакатлари ва Британия бош штаблари раҳбарларини йиғса, ядро қуролидан фойдаланиш кераклигини айтса, Россияга қарши ядро қуролини ишлатишга тайёргарлик кўраётган бўлса, шубҳасиз, бу таҳдид ҳисобланади, деди Лавров.
Шунингдек, у Макроннинг Украина таслим бўлишига йўл қўйиб бўлмаслиги ҳақидаги баёнотини “бемаънилик” деб атади. Лавров Франция президенти ўз хавотирларини россиялик ҳамкасби Владимир Путин билан муҳокама қилиш имкониятига эга экани, бироқ бундай қилмаётганини таъкидлади.
Макрон вақти-вақти билан мағрурланиб, Путинга, албатта, қўнғироқ қилиши ва у билан гаплашишини айтади. Унинг бундай имкониятлари бор. Ҳеч ким бунга тўсқинлик қилмайди. Аксинча, президент барча ҳамкасблари билан мулоқотга доим очиқлигини таъкидлаб келмоқда.
Россиянинг Европа ва Францияга қарши уруш тайёрлаётгани ҳақидаги бу ақлга сиғмайдиган айбловларга келсак, Путин бундай фикрларни алаҳсираш, сафсата деб атаб, бир неча бор ўз фикрини билдирган, деди вазир.
Шу билан бирга, у ҳар қандай “ақли расо одам” Москвага Европа билан қуролли можаро керак эмаслигини тушуниши кераклигини таъкидлади. У Европа тинчликпарвар кучларини Украинада жойлаштириш фикрига тўхталиб ўтди.
Биз ушбу (Европа) қўшинларининг Украина ҳудудидаги мавжудлигини худди НАТОнинг Украинадаги потенциал мавжудлигини кўриб чиққанимиздек кўриб чиқамиз, деди у.
Макрон ядровий қурол бўйича қандай баёнот берганди?
Франция президенти мамлакат ихтиёрида мавжуд “тийиб туриш” қуролларидан Европа хавфсизлигини таъминлашда фойдаланишга тайёрлигини айтди. У, шунингдек, мудофаа харажатлари оширилишини таъкидлаб, буни зарурат деб атади.
Макроннинг таъкидлашича, “нима бўлишидан қатъи назар, ядро қуролидан фойдаланиш тўғрисидаги қарор ҳар доим Франция президенти қўлида бўлган ва бўлади”.
Буюк Британия Европа иттифоқидан чиққандан сўнг, Франция ядро қуролига эга бўлган ягона иттифоқ мамлакати бўлиб қолди. Европа ҳудудида Американинг ядровий каллаклари жойлаштирилган, бироқ Дональд Трамп ҳокимиятга келганидан кейин Америка кучларини Европадан олиб чиқиб кетиш мумкинлиги ҳақидаги мунозаралар фаоллашди.
2017 йилда Париж “Мудофаа ва миллий хавфсизлик бўйича стратегик шарҳ”ни эълон қилди. Унда ўзининг ядро сиёсатининг асосий моҳияти белгилаб берди:
- Франциянинг ядровий тийиб туриш сиёсати фақат мудофаа характерига эга;
- ядро қуролидан фойдаланиш “фақат қонуний ўзини ҳимоя қилишнинг фавқулодда шароитларида мумкин бўлади”, шу сабабли бу қуроллар “миллат хавфсизлиги, ҳимояси ва мустақиллигининг кафолати” ҳисобланади.
Изоҳ (0)