Австралия Россияга қарши мудофаа урушини олиб бораётган Украинага тинчликпарвар кучларни юбориши мумкин. Бу ҳақда Австралия бош вазири Энтони Альбанезега таяниб, Deutsche Welle хабар берди.
Ҳозирда Австралия тинчликпарвар кучларининг халқаро миссия таркибида иштирок этиш имконияти кўриб чиқилмоқда.
Австралия аллақачон Африка, Кипр ва бир қатор тинчликни сақлаш ҳудудларида муҳим рол ўйнаб келмоқда. Биз Украинада тинчлик бўлишини хоҳлаймиз, бироқ, шу билан бирга, Россиянинг қонунга хилоф ва ахлоқсиз ҳаракатлари мукофотланмаслигига, Владимир Путин ҳам, унинг босқинчилик ниятлари ҳам рағбатлантирилмаслигига ишонч ҳосил қилишни истаймиз, деди Альбанезе.
Австралия НАТО аъзоси эмас, аммо альянснинг глобал ҳамкорлари қаторига киради. Австралия бош вазирининг баёноти АҚШ президенти Дональд Трамп Украинага барча ҳарбий ёрдамни тўхтатишни буюрганидан кейин янгради. АҚШ қуроллар юборишдаги “пауза” Украина раҳбарияти “тинчликка содиқлиги”ни намойиш қилганида давом этишини билдирди.
Украинага тинчликни кафолатларини беришни хоҳловчилар
2 март куни Буюк Британия бош вазири Кир Стармер Лондондаги саммит якунлари бўйича “Украина бўйича тинчлик келишувни ҳимоя қилиш ва уни кафолатлаш истагида бўлганлар коалициясини тузишга” ваъда берди. Буюк Британия бошқа кучлар билан бир қаторда ердаги кучлар ва ҳаводаги самолётлар билан буни қўллаб-қувватлашга тайёр.
Британиядан ташқари Ирландия ҳам Украинага қўшин юбориш режасини кўриб чиқмоқда. Ирландия бош вазири Мишел Мартин таъкидлашича, бу устувор вазифа, чунки у Украинага маълум хавфсизлик кафолатларини беради ва иқтисодий жиҳатдан келажакда мамлакат учун катта имкониятлар очади.
Изоҳ (0)