АҚШ президенти Дональд Трамп ва Украина раҳбари Владимир Зеленский ўртасидаги баҳс-мунозарага Россия президенти матбуот котиби Дмитрий Песков муносабат билдирди. Бу ҳақда “Радио маяк” хабар берди.
28 февраль куни Оқ уйда содир бўлган воқеа Украина атрофидаги вазиятни ҳал қилиш йўлига чиқиш қанчалик қийин бўлишини яққол кўрсатди. Киев режими ва Зеленский тинчликни истамайди. Улар урушнинг давом этишини хоҳлайди. Шунинг учун бу вазиятда фақат Вашингтоннинг саъй-ҳаракатлари ва Москванинг тайёргарлиги етарли бўлмайди. Жуда муҳим элемент қолиб кетмоқда, деди Песков.
У “Ғарб ўз жамоавийлигини қисман йўқота бошлагани”ни ва президент Владимир Путин можаронинг “барча нозик жиҳатлари”дан хабардорлигини айтди.
Сҳубҳасиз, у содир бўлган воқеанинг моҳиятини яхши билади. Айниқса, унинг барча тафсилотлари бутун жаҳон жамоатчилиги учун очиқ эди. Шу боис президент унинг барча нозик жиҳатларидан хабардор. Бу ғоятда ғайриоддий воқеа бўлди ва Зеленский кўп жиҳатдан, энг камида, дипломатик қобилиятлари йўқлигини намоён этди, деди Песков.
У, шунингдек, Путиннинг Оқ уйдаги можарога муносабати ҳақида сўзлади:
У содир бўлган воқеани инобатга олди ва яна бир бор бутун Россия томони Путиннинг ҳақлигига амин бўлди. Путин Россия томонининг музокаралар жараёнига очиқлигига қарамай, вазият Киев режимининг бундай жараённи қўллаб-қувватлашни истамаслигига бориб тақалаётганини таъкидлаган эди. Биз буни Вашингтонда тўлиқ намоён бўлганини кўрдик, деди Кремль матбуот котиби.
Трамп ва Зеленскийнинг учрашуви 28 февраль куни Вашингтонда бўлиб ўтди ва можаро билан якунланди, шу сабабли Украина президенти Оқ уйни муддатидан олдин тарк этди. АҚШ ва Украина ўртасидаги нодир металлар бўйича келишув жанжал туфайли бекор қилинди. Хусусан, Трамп Зеленскийни “учинчи жаҳон уруши билан ўйнашиш”да ва тинчликка тайёр эмасликда айблади. Европа етакчилари Украина раҳбарини оммавий равишда қўллаб-қувватлади.
Изоҳ (0)