Канаданинг энг кўп аҳолиси яшайдиган Онтарио провинцияси бош вазири Дуг Форд 10 мартдан бошлаб АҚШ президенти Дональд Трампнинг савдо урушига жавобан электр энергияси солиғини 25 фоизга оширди. Вазир агар Дональд Трамп савдо урушини кескинлаштирса, электр энергиясини бутунлай ўчиришдан ҳам қайтмаслигини айтди. Бу ҳақда Associated Press хабар берди.
Мен нархларни оширишдан тортинмайман. Агар Қўшма Штатлар вазиятни кескинлаштирса, мен электр энергиясини бутунлай ўчиришдан ҳам қайтмайман, деди Онтарио бош вазири Дуг Форд Торонтода бўлиб ўтган матбуот анжуманида.
У бу ишлар учун АҚШ халқи жавобгар эмаслигини қайд этди.
Аслида, мен бундай қилмоқчи эмасдим. Айниқса, савдо урушини бошламаган Америка халқи учун ўзимни жуда ёмон ҳис қиляпман. Бунга бир киши жавобгар, бу — президент Трамп, деди Форд.
Трампнинг Канадага жорий қилган 25 фоизлик божларига танаффус эълон қилишига қарамай, Онтарио тарифлари ўз кучида қолишини айтди ва бир ойлик танаффус ноаниқликдан бошқа нарса эмаслигини таъкидлади. Квебек шаҳри ҳам АҚШга электр энергияси экспорти бўйича шунга ўхшаш чоралар қўллашни кўриб чиқмоқда.
Мичиган давлат хизмати комиссиясининг жамоатчилик билан алоқалар бўйича ходими Метт Ҳелмснинг айтишича, Онтарионинг бу ҳаракати Мичиган истеъмолчиларига таъсири кичик бўлиши кутилмоқда. Чунки штатдаги электр энергиясининг асосий қисми маҳаллий коммунал компаниялар томонидан ёки узоқ муддатли шартномалар асосида ишлаб чиқарилади.
Маълумот учун, Онтарио Миннесота, Нью Йорк ва Мичиганни электр энергияси билан таъминлайди.
АҚШ—Канада савдо уруши
Трамп 2025 йилнинг 4 мартида Канада товарларига 25 фоизлик бож жорий этишни тасдиқлаган. Трамп бу таклиф гиёҳванд моддалар ва ноқонуний мигрантлар оқими билан боғлиқ муаммоларни ҳал қилиш мақсадида амалга оширилаётганини изоҳлаган. Канада ҳам бунга жавобан АҚШдан экспорт қилинаётган товарларга 25 фоизлик бож жорий қилган. Аммо 5 март куни Трамп божлар олишда танаффус эълон қилиб, муддатни 2 апрелгача чўзган.
АҚШ Канаданинг энг йирик савдо ҳамкори ҳисобланади. Канада эса АҚШ учун иккинчи йирик бозор сифатида хизмат қилади. Икки давлат ўртасидаги савдо алоқалари кўп жиҳатдан автомобиль саноати ва қишлоқ хўжалиги маҳсулотларига асосланган.
Изоҳ (0)