АҚШ президенти Дональд Трамп 4 март куни Украинага ҳар қандай ёрдамни тўхтатиб қўйди. Украина президенти Владимир Зеленский турли идоралар раҳбарларига келажакдаги ҳарбий ёрдам ҳақида расмий маълумот олишни топширди.
Украина раҳбари таъкидлашича, бугунги кунда кўпчиликда бир савол бор: “Американинг ёрдами билан бундан кейин нима бўлади?”
Мен Украина мудофаа вазирига, разведка хизматлари раҳбарларига ва дипломатларга Америка Қўшма Штатларидаги ҳамкасблари билан боғланиб, расмий маълумот олишни топширдим. Одамлар тахминлар қилмаслиги керак. Украина ва Америка мулоқотга, бир-бирининг аниқ позициясини билишга лойиқ. Айниқса, кенг кўламли уруш пайтида инсонлар ҳаётини ҳимоя қилиш ҳақида гап кетганда, деди Зеленский.
Сиёсатчи Украина бир неча ҳафта давомида турли сигналлар олгани ва ёрдам тўхтатилиши аллақачон бўлиб ўтганини айтди.
Гуманитар ёрдам, энергетика ёрдами тўхтатилди. Шунингдек, январь ойининг охирида ҳарбий ёрдам ҳам тўхтатилган эди, аммо ўшанда ҳамма нарса тезда тикланди. Биз хавф-хатарларни кўрдик. Шунинг учун бизнинг хизматларимиз — ҳам ҳарбий, ҳам махсус хизматлар — вазиятнинг ҳар қандай ривожланишида ҳаракат алгоритмларини ишлаб чиқишга улгурди. Ҳозир 2022 йил эмас. Ҳозир бизнинг барқарорлигимиз юқорироқ. Бизда ҳимоя воситалари мавжуд, деди у.
Шу билан бирга, президент Украина учун “урушни ҳақиқатан ҳам тугатишда Америка билан нормал, шериклик муносабатлари муҳим” эканини таъкидлади.
Ҳеч биримиз чексиз урушни хоҳламаймиз, деб изоҳ берди Зеленский.
У Украина “кўрсатилган ва кўрсатилаётган ҳамда бугунги кунда Европада хавфсизликнинг анча нозик асосларини сақлаб қолишга хизмат қилаётган барча ёрдам учун” Америкага доимо миннатдор бўлишини билдирди.
АҚШ ҳарбий ёрдами тўхташи
АҚШ Украинага барча жорий ҳарбий ёрдамни унинг раҳбарияти тинчликка содиқлигини намойиш этмагунча тўхтатади. Пентагоннинг юқори мартабали вакили мазкур маълумотни тасдиқлаган. Оқ уйдаги жанжалдан сўнг Трамп агар украиналик ҳамкасби Зеленский тинчлик истаётганини тасдиқласа, Киев Вашингтон билан музокараларга қайтиши мумкинлигини айтди.
Шундан сўнг 5 март куни Трамп Украина президентидан “муҳим мактуб” олганини, унда Украина тинчлик музокараларига тайёрлигини ёзилганини айтди. АҚШ президенти Россиядан ҳам бу борада “кучли сигналлар” бўлганини қайд этди.
АҚШ 2022 йил 24 февралдан бери Украинага 65,9 миллиард долларлик ҳарбий ёрдам кўрсатди. Вашингтон Киевга қанча миқдорда қурол юборганини маълум қилмади.
Изоҳ (0)