Kreml Jiddada AQSH va Ukraina o‘rtasidagi muzokaralarda ilgari surilgan takliflarni o‘rganmoqda va Vashington Moskvaga uchrashuv tafsilotlari haqida axborot berishiga umid qilmoqda. Bu haqda Rossiya Federatsiyasi prezidentining matbuot kotibi Dmitriy Peskov chorshanba kuni o‘tkazilgan brifingda ma’lum qilgan.
“Biz natijalar bo‘yicha berilgan bayonotlarni diqqat bilan o‘rganyapmiz, qabul qilingan qo‘shma bayonot matni bilan tanishyapmiz. Kecha Jiddada aytilganidek, davlat kotibi Rubio va milliy xavfsizlik bo‘yicha yordamchi Uolts shu kunlarda turli kanallar orqali o‘tkazilgan muzokaralar tafsilotlari va erishilgan kelishuvlar haqida bizga ma’lumot berishiga umid qilyapmiz”, degan Peskov.
Peskovning ta’kidlashicha, Kreml shu kunlarda amerikaliklar bilan aloqa o‘rnatgan bo‘lib, bu jarayonda ma’lumotlarning to‘liq bo‘lishiga ishonadi.
U yaqin kelajakda Rossiya va AQSH o‘rtasida “oliy darajadagi telefon suhbati mavzusi” ko‘tarilishi mumkinligini istisno etmadi.
“Agar shunday ehtiyoj tug‘ilsa, u juda tez tashkil etiladi. Amerikaliklar bilan mavjud muloqot kanallari buni yetarlicha qisqa muddat ichida amalga oshirish imkonini beradi”, deya qo‘shimcha qilgan u.
Uning aniqlik kiritishicha, telefon suhbati bo‘yicha kelishuvlar yuzasidan Vashington tomonidan so‘rov hali mavjud emas.
Ma’lumot uchun, Saudiyada AQSH—Ukraina delegatsiyalari o‘rtasidagi uchrashuv 9 soat davom etdi. Yakunda Ukraina 30 kunlik o‘t ochishni to‘xtatish taklifini qabul qilgan, lekin avval Rossiya rozi bo‘lishi kerakligi aytilgandi.
Izoh (0)