Оқ уй матбуот котиби Керолин Ливитт сешанба куни ўтказилган брифинг давомида АҚШ раҳбарининг божни ошириш бўйича қарорларига норозилик билдирган Associated Press агентлиги журналисти билан жанжаллашиб қолди.
Мухбир Америка раҳбарининг божхона тўловларини ошириш бўйича қарорларига норозилигини айтиб, Трамп солиқларни камайтириш ваъдаларини бажармаётганини, импортга қўшимча тарифлар жорий этиш орқали уларнинг ошишига ҳисса қўшаётгани ҳақида фикр билдирган.
Оқ уй вакили Керолин Ливитт бунга эътироз билдириб, унинг гапини бўлган ва “Бу тўғри эмас” деган.
“У ҳақиқатан ҳам солиқларни оширмаяпти. Тарифлар — бу бизни алдаётган хорижий давлатлар учун солиқларнинг ошиши, Америка халқи учун эса солиқларнинг пасайишидир. Президент ўз ваъдаларига содиқ қолмоқда”, дея Ливитт ўз фикрларини баён қилган.
“Маълумки, у маслаҳатлар, қўшимча иш ва ижтимоий суғурта имтиёзлари учун солиқларни бекор қилишни ёқлади. У учаласи бўйича ҳам ўзига масъулият олган ва бу йилда Конгресс уларни қабул қилишини кутмоқда”, дея қўшимча қилган.
“Кечирасиз, сиз солиқларни тўладингизми? Чунки, мен тўлаганман. Улар хорижий компаниялардан ундирилмайди, аксинча импорт қилувчилардан олинади”, деб жавоб берган журналист.
Ливитт эса бошқа журналистга ўтиш жараёнида мухбир унинг иқтисодий билимларини текширишга уриниши ўзи учун ҳақоратли эканлигини билдирган.
“Иқтисодий билимимни синашга уринишингиз ҳақоратлидир. Энди Associated Pressъга савол бериш имконини берганимдан афсусдаман”, дея таъкидлаган Оқ уй вакили.
Аввалроқ, АҚШ маъмурияти Associated Press журналистларининг Оқ уйга киришини чеклаб қўйганди. Associated Press эса Оқ уйни АҚШ конституциясини бузишда айблаганди.
Агентлик мухбирлари ва фотосуратчилари Оқ уйнинг Овал хонаси ва бошқа айрим биноларига кира олмаганидан сўнг, Associated Press Левитт, Оқ уй ходимлар аппарати раҳбари Сюзан Уайлс ва унинг биринчи ўринбосари Тейлор Бадовичга қарши судга даъво аризаси топширган.
Изоҳ (0)