Польша бош вазири Дональд Туск мамлакатда барча эркаклар учун ҳарбий тайёргарликни мажбурий қилиш устида иш олиб борилаётганини эълон қилди. У бу ҳақда Польша парламентида, Россия томонидан ортиб бораётган таҳдид шароитида мамлакат хавфсизлигини таъминлаш чора-тадбирлари ҳақидаги мажлисда маълум қилди.
Биз йил охирига қадар уруш юз берган тақдирда Польшадаги ҳар бир балоғат ёшига етган эркакнинг ҳарбий тайёргарликдан ўтишини назарда тутувчи моделни ишлаб чиқишга ҳаракат қиламиз. Шунингдек, шакллантирилган захира юзага келиши мумкин бўлган таҳдидларга мос равишда ташкил этилади, деди Туск Сеймда сўзга чиқиб.
Унинг таъкидлашича, ҳозирда Украина армияси 800 минг аскардан иборат, Россия армияси эса 1,3 миллион атрофида. Польша армияси, захирадагилар билан бирга, 200 мингдан 500 минггача оширилиши керак, дея қўшимча қилди у.
Биз ҳамма нарсани тўғри ташкил қилиб бир нечта усуллардан фойдалана оламиз. Бу захирадаги ҳарбийларни жалб қилишни ҳамда армияга бормайдиганлар уруш чоғида тўлақонли ва малакали аскарга айланиши учун интенсив тайёргарликдан ўтишини англатади, деди бош вазир.
Тускнинг таъкидлашича, аёллар ҳам ҳарбий тайёргарликдан ўтиши мумкин, аммо “уруш ҳануз асосан эркакларнинг иши бўлиб қолмоқда”.
Бош вазир, шунингдек, Франциянинг ядро ҳимоя соябонини бутун Европага ёйиш таклифини ҳукумат синчковлик билан ўрганаётганини маълум қилди.
“Аввало, бу таклиф ядро қуролини бошқариш нуқтайи назаридан нимани англатишини батафсил билишни истайман”, деди у.
Туск Украина ўзининг ядро арсеналидан воз кечганидан кейин ҳужумга учраганини эслатиб, Варшава, гарчи бу узоқ вақт талаб қилса ҳам, ўз ядро қуролига эга бўлишни хоҳлашини таъкидлади.
Бугунги кунда ўз ядро арсеналимиз бўлса, анча хавфсизроқ бўлишимиз аниқ, бу шубҳасиз. Бироқ бу йўл жуда узоқ ва бунга эришиш учун келишув зарур бўлади, деди у.
Жорий йилда Польша мудофаа учун ЯИМнинг 4,7 фоизини сарфлашни режалаштирмоқда, бу НАТОдаги энг юқори кўрсаткичдир.
Туск парламентда бу харажатларни ЯИМнинг 5 фоизигача ошириш кераклигини айтди.
Бундан аввал президент Анжей Дуда мудофаа харажатларини ЯИМнинг 4 фоиз даражасида мажбурий қилиш учун конституцияга ўзгартириш киритишни таклиф қилган эди.
Бош вазир, шунингдек, Польшанинг пиёдаларга қарши миналарни қўллашни тақиқловчи Оттава конвенциясидан, шунингдек, касетли бомбалардан фойдаланишни тақиқловчи Дубльин конвенциясидан чиқишини қўллаб-қувватлашини билдирди.
Польша 2022 йилда Россия қўшни Украинага тўлақонли бостириб кирганидан кейин мудофаа харажатларини кескин оширди. Мамлакат АҚШ билан тахминан 20 миллиард долларлик ҳарбий техника етказиб бериш бўйича шартномалар имзолади. Варшава шунингдек, Жанубий Корея билан К2 танклари ва ФА-50 енгил жанговар самолётларини сотиб олиш бўйича шартномалар имзолаган.
АҚШ президенти Дональд Трамп Украинага ҳарбий техника етказиб беришни тўхтатиш тўғрисида қарор қабул қилганидан сўнг, поляклар ўз келажакдаги хавфсизлигидан тобора кўпроқ хавотирланмоқда. Полякларнинг аксарияти Украинани қўллаб-қувватлаш ўзларининг хавфсизлик манфаатларига мос келишига ишонади.
Изоҳ (0)