Эрон президенти Масъуд Пезешкиён АҚШ кучли босим қилаётган пайтда ҳеч қандай музокара ўтказмаслигини айтиб, Дональд Трампга қатъий жавоб қайтарди.
Улар (АҚШ) буйруқ бериб, таҳдид қилиши биз учун қабул қилиб бўлмайдиган ҳолат. Мен ҳатто сиз билан ҳам музокара қилмайман. Хоҳлаган нарсангизни қилинг, деб ёзмоқда давлат нашрлари Пезешкиённинг сўзларини иқтибос келтирган ҳолда.
Бироқ таъкидлаш жоиз, Пезешкиён мамлакатнинг ташқи сиёсатини белгиловчи асосий шахс эмас — бу борада сўнгги қарорни Эрон олий раҳнамоси Али Хоманаий қабул қилади.
Эрон президенти аввалроқ АҚШ билан музокараларга шахсан қарши эмаслигини билдирган, бироқ Хоманаий рози бўлмагунча бундай мулоқот бўлмаслигини тан олган эди.
Ўтган ҳафта Трамп Хоманаийга мактуб йўллаб, Эрон ядро дастури бўйича янги музокараларни бошлашга чақирди. АҚШ президенти, шу билан бирга, Теҳронга таҳдид қилиб, агар музокарадан бош тортилса, ҳарбий чора кўрилиши мумкинлигини айтди.
Бунга жавобан Хоманаий Трампнинг исмини очиқ тилга олмаган ҳолда Оқ уйнинг босим сиёсатини танқид қилди.
Баъзи тажовузкор ҳукуматлар — мен айрим хорижий шахслар ва етакчиларни тавсифлаш учун “тажовузкор” сўзидан кўра мосроғини билмайман — музокараларни зўр бериб талаб қилмоқда. Уларнинг музокаралардан мақсади муаммоларни ҳал қилиш эмас, балки ҳукмронлик ўрнатиш, деди у.
Унинг айтишича, АҚШ музокараларни баҳона қилиб Эроннинг ядро дастуридан ташқари ҳарбий салоҳияти ва минтақадаги таъсирини ҳам чеклашга ҳаракат қилмоқда.
Теҳрон эса “максимал босим” остида ҳеч қандай мулоқот бўлмаслигини таъкидлаган.
Дональд Трампнинг биринчи президентлик муддатида кенг қўлланган босим сиёсати у Оқ уйга қайтиши билан қайта тикланди.
Эрон 2015 йилда имзоланган, бироқ АҚШ 2019 йили ундан бир томонлама чиққан “ядро битими”га қайтишга тайёрлигини билдирган. Бироқ Вашингтон санкцияларни юмшатиш эвазига ядро дастурига чеклов қўйишни назарда тутувчи келишувга янги талабларни қўшмоқда.
Изоҳ (0)